Foto nga CFP

Përqendrimet e gazit serrë, niveli global i detit dhe nxehtësia e oqeanit arritën nivele rekord në vitin 2022, sipas një rishikimi vjetor të klimës globale të publikuar në internet të mërkurën.

Raporti mbi klimën, vlerësimi i 33-të vjetor i përpiluar nga Qendrat Kombëtare për Informacionin Mjedisor në Administratën Kombëtare të Oqeanit dhe Atmosferës së SHBA-së, bazohet në kontributet e më shumë se 570 shkencëtarëve në mbi 60 vende, bën të ditur “Xinhua”.

Ai siguron përditësimin më të plotë për treguesit e klimës së Tokës, ngjarjet e dukshme të motit dhe të dhëna të tjera të mbledhura nga stacionet dhe instrumentet e monitorimit mjedisor të vendosura në tokë, ujë, akull dhe në hapësirë.

Sipas raportit, përqendrimet e gazit serrë në Tokë ishin më të lartat në vitin 2022. Tendencat e ngrohjes vazhduan në të gjithë globin.

Një sërë analizash shkencore tregojnë se temperatura vjetore e sipërfaqes globale ishte 0.25 deri në 0.30 gradë Celsius mbi mesataren e 1991-2020-s.

Valët e të nxehtit thyen rekordet e temperaturës në të gjithë planetin, sipas raportit. Në korrik, një valë e nxehtë 14-ditore përfshiu Evropën Perëndimore. Sipas raportit, nxehtësia rekord e verës në Azinë Qendrore dhe Lindore, veçanërisht në pellgun e lumit Yangtze, çoi në një thatësirë shkatërruese që preku më shumë se 38 milionë njerëz dhe shkaktoi një humbje të drejtpërdrejtë ekonomike prej 4.75 miliardë dollarë amerikanë. (Elona)