Foto nga VCG

Frans Timmermans, shefi i politikës për klimën i Bashkimit Evropian, dha zyrtarisht dorëheqjen nga Komisioni Evropian për të kandiduar në zgjedhjet e ardhshme holandeze. Komisioni Evropian njoftoi dorëheqjen e tij në të njëjtën ditë kur Timmermans, si i vetmi i nominuar, u miratua si kandidati kryesor i aleancës së re zgjedhore midis Partisë së tij Laburiste dhe të Gjelbërve.

Të dyja partitë vendosën të konkurrojnë si një listë e përbashkët për herë të parë në zgjedhjet e parakohshme parlamentare të Holandës pasi koalicioni i mëparshëm i qendrës së djathtë u shpërbë papritur për shkak të politikës së azilit, shkruan “ATSH”.

Presidentja e Komisionit Evropian, Ursula von der Leyen falënderoi Timmermans për shërbimin e tij dhe vlerësoi punën e tij drejt përmbushjes së objektivave të BE-së për t’u bërë vendi i parë neutral ndaj klimës. Gjatë gati 10 viteve të tij në Bruksel, politikani holandez ishte përgjegjës, ndër të tjera, për Marrëveshjen e Gjelbër, politikën kryesore të BE-së për të zbutur ndryshimet klimatike.

Ai ishte ministër i Jashtëm përpara se të shkonte në Bruksel në vitin 2014. Timmermans, 62 vjeç, tha në korrik se donte të ishte kryeministri i ardhshëm i Holandës.

Von der Leyen vendosi të emërojë zëvendëspresidentin e Komisionit Evropian, Maroš Šefčovič, për të marrë portofolin e Marrëveshjes së Gjelbër të Timmerman dhe përkohësisht përgjegjësitë e tij të politikës së veprimit për klimën. (Elona)