Foto nga VCG

Në përgjigje të përmbytjeve më të këqija në pellgun e lumit Haihe që nga viti 1963, autoritetet kineze po japin fondet e rimëkëmbjes në zonë.  

Rreth 22 lumenj në pellg pësuan përmbytje mbi nivelin e paralajmërimit dhe tetë lumenj raportuan përmbytjet më të mëdha të regjistruara ndonjëherë, njoftoi Ministria e Burimeve Ujore, shkruan “Xinhua”.  

Me uljen e nivelit të ujërave të përmbytjeve, që nisën më 28 korrik e vazhduan deri më 1 gusht, banorët kanë filluar të kthehen në shtëpi.  

Autoritetet e sistemit të ruajtjes së ujit në Kinë kanë bërë gjithçka në menaxhimin e parandalimit dhe kontrollit të përmbytjeve. Departamentet përkatëse provinciale dhe komunale të ruajtjes së ujit kanë dhënë 341 milionë paralajmërime për fatkeqësitë për përrenjtë malorë, deklaroi zëvendësministri i Burimeve Ujore, Liu Weiping.  

Për të minimizuar ndikimin dhe dëmet e shkaktuara nga përmbytjet, ministria ka dërguar 26 ekipe pune dhe grupe ekspertësh për të udhëhequr parandalimin e përmbytjeve dhe menaxhimin e rrezikut në bazë.  

Kina ndau 500 milionë juanë shtesë (rreth 69.4 milionë dollarë amerikanë) më 19 gusht, mbi 1 miliard juanë të shpallur më 9 gusht, për të ndihmuar njerëzit t’i kthehen normalitetit. 

Duke vënë në dukje se sezoni i përmbytjeve është ende në vazhdim, me përmbytje dhe thatësira të rënda e të ndërlikuara që priten ende, Liu tha se ministria do të vazhdojë të forcojë të gjitha masat parandaluese dhe mos të kursejë asnjë përpjekje. (Elona)