Foto nga VCG

Izraeli njoftoi se SHBA-ja ka dhënë dritën jeshile për t’i shitur Gjermanisë sistemin e mbrojtjes izraelite “Arrow 3”, duke hapur rrugën për një marrëveshje të rëndësishme të mbrojtjes, raporton “ATSH”.

Ministria izraelite e Mbrojtjes bëri të ditur se marrëveshja prej 3.5 miliardë dollarësh do të jetë marrëveshja më e madhe për mbrojtjen e arritur ndonjëherë në vend.

Departamenti amerikan i Shtetit njoftoi qeverinë izraelite se qeveria amerikane ka miratuar kërkesën e Izraelit që Gjermania të blejë sistemin e mbrojtjes raketore “Arrow 3” nga Izraeli”, tha një zëdhënës i Ministrisë së Mbrojtjes në një deklaratë.

Miratimi i SHBA-së u pa si pengesa e fundit e madhe për marrëveshjen historike midis Gjermanisë dhe Izraelit.

“Marrëveshja duhet të nënshkruhet nga Ministritë e Mbrojtjes të të dy vendeve dhe Industria e Hapësirës Ajrore të Izraelit, prodhuesi kryesor i hapësirës ajrore dhe aviacionit në vend. Kontrata e plotë do të jetë gati për t’u nënshkruar deri në fund të vitit 2023”, thuhet në deklaratë.

Komisionet e buxhetit dhe mbrojtjes të Parlamentit gjerman kishin votuar pro blerjes së sistemit në qershor.

Paratë për blerjen do të sigurohen nga fondi special prej 100 miliardë eurosh i miratuar në përgjigje të konfliktit Rusi-Ukrainë.

“Arrow 3” u prodhua bashkërisht nga Izraeli dhe SHBA-ja dhe do të jetë operacional deri në fund të vitit 2025.

Me iniciativën e Gjermanisë, ai do të bëhet pjesë e një sistemi evropian të mbrojtjes ajrore.

“Arrow 3” është një armë e nivelit të lartë të sistemit të mbrojtjes raketore të Izraelit me shumë faza dhe mund të shkatërrojë armët sulmuese në një lartësi prej më shumë se 100 kilometrash. (Elona)