Roja Bregdetare e Kinës njoftoi se dëboi dy anije riparimi dhe dy anije të rojes bregdetare nga Filipinet që shkelën ujërat territoriale të Kinës pranë Ren'ai Jiao, pjesë e ishujve Nansha në Detin e Kinës Jugore, njofton “CGTN”.

Roja Bregdetare e Kinës ka zbatuar kontrollet e nevojshme në përputhje me ligjin dhe ka ndaluar anijet filipinase që transportonin materiale ndërtimi të paligjshme, deklaroi një zëdhënës i Rojës Bregdetare të Kinës.

“Ne i bëjmë thirrje palës filipinase që të ndalojë menjëherë aktivitetet e saj shkelëse në këto ujëra”, tha zëdhënësi, duke shtuar se Kina ka sovranitet të padiskutueshëm mbi ishujt Nansha dhe ujërat e tyre, përfshirë Ren'ai Jiao.

“Roja Bregdetare e Kinës do të vazhdojë të kryejë aktivitete të zbatimit të ligjit në ujërat nën juridiksionin e Kinës sipas ligjit”,- tha zëdhënësi. (Fatosi)