Foto nga ATSH

Ertjan Kofsha u shpall kampion i Evropës për të rinj në stilin e shkëputjes në kampionatin për të rinj të peshëngritjes që po zhvillohet në Rumani.

Peshëngritësi 18-vjeçar ishte më i miri në këtë stil duke ngritur 153 kilogramë në provën më të mirë për peshën deri 89 kilogramë, shkruan “ATSH”.

Ertjani më pas u rendit i treti në shtytje me 184 kilogramë dhe dygarësh me 337 kilogramë në total, duke marrë 2 medalje bronzi.

Ai kaloi me sukses të gjitha provat.

Ertjan Kofsha edhe më herët ka pasur sukses në kampionatet e moshave, ku ka marrë medalje.

Në Evropianin e të rinjve që po mbahet në Bukuresht paraqitje të mirë patën edhe Enkileda Carja e Samoel Rasa, të cilët u përfshinë mes më të mirëve në garat e tyre. (Elona)