Pedagogu Glendi Xhani në intervistë për CMG (Foto CMG)

“Ti dhe unë në Pekin” (You and me in Beijing) është motoja e Kampit Veror, që organizohet prej disa vitesh nga Zyra Qendrore e Institutit Konfuci (Hanban) dhe Universiteti i Studimeve të Gjuhëve të Huaja të Pekinit (BFSU) si dhe organizma të tjerë arsimorë të Kinës.

Kampi Veror BFSU është një program për promovimin e gjuhës dhe kulturës kineze në mbarë botën që është kthyer në një platformë afatgjatë për avancimin dhe ndërveprimin mes të rinjve nga vende të ndryshme. Me synim promovimin e shkëmbimeve kulturore dhe kultivimin e perspektivës ndërkombëtare midis të rinjve nga vende të ndryshme, Kampi Veror në agjendën e tij ka një sërë aktivitetesh interesante gjuhësore dhe kulturore, përfshirë takime mes studentëve kinezë dhe atyre të huaj, shkëmbime kulturore, orë mësimi të gjuhës kineze, vizita në objektet kulturore më të njohura të Pekinit, por dhe takime të studentëve të huaj me familje vendëse, duke parë nga afër jetën e tyre.

Studentët nga brenda dhe jashtë vendit mund të përjetojnë kulturën tradicionale kineze, të kuptojnë qytetërimin modern kinez dhe të ndërtojnë miqësi përmes ndërveprimeve midis kulturave dhe ideologjive të ndryshme. Në një atmosferë të relaksuar me aktivitete tematike të gjalla 5 studentë shqiptarë të Institutit Konfuci të shoqëruar nga pedagogu i tyre Glendi Xhani do të jenë pjesë e këtyre shkëmbimeve në mësimin e kinezishtes, por dhe të veprimtarive në kampusin universitar si lojra, kaligrafi, artet marciale taichi, gatime tradicionale, por dhe vizita në Murin e Madh Kinez, Qytetin e Ndaluar, Tempullin e Qiellit, Pallatin perandorak të Verës etj. Ata do të nisen drejt Pekinit më 17 korrik për të qëndruar dy javë si banorë të Kampit Veror “You and me in Beijing”

Pedagogu i Institutit Konfuci pranë Universitetit të Tiranës, Glendi Xhani në intervistë për Grupin Mediatik të Kinës tregon axhendën e Kampit Veror të Pekinit, pjesëmarrjen e studentëve shqiptarë dhe pritshmëritë e tyre.

Kampi Veror BFSU (Foto BFSU)

CMG: Kampi Veror i Pekinit ka një tematikë të përcaktuar. Titullohet “You and me in Beijing”. Glendi do të jeni një nga pjestarët e ekipit shqiptar në këtë kamp, pedagog shoqërues i studentëve në këtë eksperiencë. Flasim për axhendën e Kampit Veror, kur do të niseni, sa vetë jeni ?

Glendi Xhani: Kampi Veror është një organizim që zhvillohet një herë në vit. Kësaj radhe jemi 5 studentë dhe unë. Do të nisemi më 17 korrik dhe Kampi Veror zgjat dy javë. Axhenda është e parapërcaktuar dhe përfshin aspektin akademik dhe kulturor. Studentët do të kenë mundësinë ta shijojnë Kinën e vërtetë.

CMG: Pra studentët do të bëjnë orë mësimore të kinezishtes por dhe veprimtari të tjera jo vetëm në mjediset e kampusit universitar

Glendi Xhani: Sipas axhendës studentët përveç studimit të gjuhës kineze kanë dhe kaligrafi, sporte të ndryshme që i afrojnë studentët shumë me njeri-tjetrin, sepse atje do të ketë studentë nga e gjithë bota

CMG: Keni informacion se sa do të jetë përafërsisht numri i studentëve pjesmarrës në Kampin Veror të Pekinit?

Glendi Xhani: Përafërsisht numri i pjesmarrësve është rreth 190 vetë

CMG: Po nga Instituti Konfuci i Tiranës sa është pjesmarrja?

Glendi Xhani: Do të jetë 5 studentë dhe unë si pedagog që i shoqëroj

CMG: Si janë përzgjedhur studentët që do të marrin pjesë në Kampin Veror?

Glendi Xhani: Studentët janë përzgjedhur në bazë të moshës sepse ka një kriter moshe nga 15 deri në 25 vjeç, si dhe kriteti i HSK pra duhet të kenë certifikatë të njohjes së gjuhës kineze nga niveli i dytë e lart.

CMG: Besoj se me këtë rast studentët në axhendën e qëndrimit në Kampin Veror do të kenë rastin të vizitojnë objektet historike dhe kulturore të Pekinit

Glendi Xhani:Qendrat më të njohura të vizitorëve, si Qyteti i Ndaluar, Pallati i Verës apo Muri i Madh Kinez janë pjesë e axhendës, por për mendimin tim një nga gjerat më të veçanta dhe më interesante është se studentët do të kenë mundësi të shkojnë në një familje kineze dhe të shohin se si ata jetojnë në përditshmëri. Na kanë dhënë një mundësi të veçantë që studentët të shohin realisht se si jeton një familje në Kinë.

CMG: Studentët shqiptarë besoj se do të kenë kontakte dhe me studentë kinezë në Kampin Veror

Glendi Xhani: Patjetër, sidomos me studentë kinezë që kanë mësuar apo mësojnë aktualisht gjuhën shqipe në Kinë do të kenë një kontakt të vazhdueshëm sepse dhe ata në të ardhmen do të vijnë në Shqipëri. Ndërkohë studentët tanë në të ardhmen mund të ndjekin studimet apo mund të gjejnë një punë në Kinë.

CMG: Pra studentëve shqiptarë kjo eksperiencë ju shërben edhe për krijimin e lidhjeve dhe për të parë konkretisht mundësitë e çuarjes më tej të studimit të kinezishtes që kanë nisur në këtë institut. Studentëve shqiptarë kështu gjuha kineze do t’ju vlejë dhe për të ardhmen. A do të pajisen në këtë Kamp Veror studentët me certifikatë?

Glendi Xhani: Në përfundim të këtij eventi të gjithë studentët pjesmarrës do të marrin një certifikatë nga BFSU dhe Intituti Konfuci Hanban, nëse ata i realizojnë të gjitha klasat, si dhe marrin pjesë në të gjitha veprimtaritë. Frekuentimi është i rëndësishëm dhe në rast të mospjesmarrjes në ndonjë veprimtari nuk certifikohesh. Por kjo deri tani nuk ka ndodhur sepse studentët tanë po shkojnë për të mësuar gjuhën dhe kulturën atje.

CMG: Si po e presin studentët tuaj pjesmarrjen në këtë Kamp Veror? Ky është kampi i parë para pandemisë Covid 19 sepse para saj në këtë veprimtari kanë shkuar studentë shqiptarë të Institutit Konfuci

Glendi Xhani: Ka studentë që janë miratuar për të shkuar në këtë Kamp Veror dhe ata mezi po e presin sepse nuk e kanë idenë se si mund të jetë Kina duke e parë vetë, duke shkuar vetë atje.  Ata e kanë parë nëpër filma apo dokumentarë por është ndryshe ta shohësh vetë. Gjithashtu kanë një indikator të veçantë sepse ka patur studentë që kanë shkuar në Kampin Veror të 2019, që aplikuan përsëri për të shkuar edhe sivjet. Kjo tregon se sa janë kënaqur dhe e kanë vlerësuar.

CMG: Kam mësuar se në Kampin Veror të Pekinit çdo vit ka një pjesmarrje shumë të madhe të studentëve nga institute nga thuajse e gjithë bota. Studentët shqiptarë duke qenë përgjithësisht të hapur dhe komunikues përveç studentëve kinezë me siguri do të krijojnë miqësi e lidhje dhe me këta studentë

Glendi Xhani: Patjetër dhe është diçka shumë e veçantë sidomos për studentët nga vende të ndryshme të botës që mblidhen bashkë për një Kamp Veror. Kjo është një mundësi që nuk të jepet shumë shpesh.

CMG: Gjykoni që këto dy javë do të ndikojnë në formimin akademik të studentëve? Një fjalë thotë se “Gjuha mësohet atje ku flitet” dhe studentët tanë e kanë mësuar në teori kinezishten, por a do të ndikojë kjo eksperiencë dyjavore, qoftë dhe në praktikimin e saj?

Glendi Xhani: Besoj se do të ndikojë shumë sepse kur mëson te një institut dhe sidomos kur je në vendin tënd nuk e arrin dot atë nivel gjuhe që kërkon. Edhe unë që prej vitesh kam jetuar në Kinë aktualisht e kam të thjeshtë të përshtatem me gjuhën, por një person që nuk ka qenë kurrë në Kinë, nuk e njeh realitetin se çfarë mund të ofrojë ajo.

CMG: Fakti që do të jenë në Pekin, edhe pse vetëm dy javë studentët do të kenë mundësi ta përdorin kinezishten e mësuar në Tiranë në rrugë, në kontakte me njerëz të ndryshëm, duke blerë diçka. Ky është një shans i madh për ta

Glendi Xhani: Për momentin në Shqipëri nuk ka një komunitet të madh kinez,siç ndodh për shembull në Budapest ku jetojnë mbi 20 mijë kinezë dhe tyre që studiojnë kinezishten u orfohet mundësia ta flasin atë. Ndaj këtu nuk e kanë mundësinë e praktikimit të gjuhës. Kur të jenë në Pekin studentët tanë do të kenë mundësinë që në kontakt me kinezët ta praktikojnë gjuhën sa më shumë.

Disa nga studentët e Institutit Konfuci të Tiranës që do të jenë pjesë e Kampit Veror të Pekinit ndajnë me ne emocionet e tyre para nisjes

Klajdi Xixi: Do të jem pjesë e Kampit Veror në Pekin. Për momentin studioj për Financë në Universitetin e Tiranës, në vitin e tretë Bachelor. Ndërkohë jam student i Institutit Konfuci në nivelin e tretë dhe e studioj kinezishten prej afro një vit e gjysmë. Mezi pres të shkoj në Pekin, të shoh një kulturë ndryshe, të takoj njerëz të rinj dhe për një eksperiencë ndryshe nga ajo europiane.

Studentja Tea Selmani (Foto CMG)

Tea Selmani: Unë kam mbaruar studimet e larta për Matematikë në Fakultetin e Shkencave të Natyrës në Tiranë. Jam studente e Institutit Konfuci prej vitit 2017 dhe kam mbaruar nivelin e katërt të gjuhës kineze. Do të shkojmë në Kampin veror në Pekin. Mirupafshim në Pekin!

Skervi Baushi: Unë jam student i Universitetit “Polis” për Dizajn të Aplikuar në vitin e dytë Master. Gjithashtu jam student i Institutit Konfuci prej dy vitesh në nivelin HSK 3 dhe dëshiroj shumë të ndjek studimet në Pekin duke qenë se dega ime atje është shumë e zhvilluar, si pjesë e zhvillimit teknologjik të vendit.

Intervistoi Eda Merepeza