Foto nga VCG
Vizitorët në një panair ndërkombëtar investimesh dhe tregtie në komunën Chongqing të Kinës Jugperëndimore u mahnitën nga gama inovative e automjeteve të reja me energji të shfaqura nga “SERES”, që do të dalin në tregun global përmes Korridorit të Ri Ndërkombëtar të Tregtisë Tokë-Det. Korridori është një kalim tregtar dhe logjistik, i ndërtuar bashkërisht nga rajone të nivelit provincial në Kinën Perëndimore dhe vendet e ASEAN-it. Ai është gjithashtu një nga projektet kryesore në kuadër të nismës “Një brez, një rrugë”.
"Krahasuar me rrugën e vjetër përmes lumit dhe detit, korridori i ri tregtar mund të na kursejë 10 deri në 20 ditë. Ai ka luajtur një rol vendimtar për kompaninë tonë në zgjerimin e gjurmëve të saj në tregjet jashtë shtetit",- tha Zhang Xingyan, menaxher i përgjithshëm i divizionit të biznesit jashtë shtetit në “SERES Group”, një prodhues makinash me qendër në Chongqing.
Për shembull, përmes korridorit tregtar, produktet e “SERES” mund të arrijnë në Indonezi vetëm për rreth 18 ditë, ndërsa më përpara do të duhej rreth një muaj. Që nga viti 2022, kompania ka eksportuar automjete dhe pjesë automjetesh me vlerë rreth 2 miliardë juanë (rreth 284.39 milionë dollarë amerikanë) përmes korridorit tregtar në shumë vende, përfshirë Indonezinë, Perunë dhe Ekuadorin.
Foto nga VCG
Duke qenë se korridori tregtar ofron një kanal më të shpejtë dhe më efikas, me kosto të reduktuara transporti dhe operimi, “SERES” ka rritur investimet e tij jashtë shtetit. Deri sot, kompania ka investuar 150 milionë dollarë amerikanë në krijimin e një baze të prodhimit të automobilave në Indonezi.
Rritja e shpejtë e kompanisë ilustron mundësitë e pafundme të ofruara nga korridori tregtar.
Falë korridorit tregtar, një numër në rritje i produkteve nga provincat dhe rajonet e brendshme të Kinës përgjatë rrugës, si vera e kuqe e Rajonit Autonom Ningxia Hui apo arrat nga Rajoni Autonom i Xinjiang Uygur, kanë hyrë në tregje më të gjera në mbarë botën.
"Ne pamë një pjesëmarrje në rritje të provincave dhe rajoneve kineze, si dhe vendeve dhe rajoneve përgjatë rrugës, çka tregon parimin themelor të rritjes së përbashkët përmes konsultimit dhe bashkëpunimit",- tha Liu Wei, drejtor i qendrës së logjistikës dhe koordinimit të operacioneve të Korridorit të Ri Ndërkombëtar të Tregtisë Tokë-Det.
Katër vjet më parë, korridori tregtar lidhte 166 porte në 71 vende, por tani është zgjeruar duke përfshirë mbi 390 porte në 119 vende. Mobiliet laosiane nga druri i kuq, durianët filipinas dhe kafeja indoneziane mund të arrijnë në Chongqing përmes korridorit tregtar në vetëm pak ditë. Wu Yang, i cili ka qenë prej kohësh i angazhuar në biznesin e transportit midis Kinës dhe Laosit, e vlerëson përdorimin e korridorit tregtar për reduktimin e ndjeshëm të kohës së transportit.
"Do të duheshin më shumë se 20 ditë për të transportuar mallra nga Laosi në brendësinë perëndimore të Kinës në Chongqing dhe Sichuan. Falë korridorit tregtar, koha e transportit është shkurtuar në katër ditë",- tha Wu.
Korridori tregtar shërben si një lidhje jetike midis Azisë dhe Evropës, duke dhënë një kontribut thelbësor në zhvillimin dhe integrimin ekonomik rajonal. Ndikimi i tij është veçanërisht i dukshëm në sigurimin e zinxhirëve të sigurt të furnizimit për lëndët e para thelbësore, si ushqimi, kimikatet, plehrat dhe energjia, tha Ahmad Parveez Hj Ghulam Kadir, drejtor i përgjithshëm i Bordit Malajzian të Vajit të Palmës.
"Ne do të forcojmë më tej kapacitetet tona operacionale dhe organizative, do të përmirësojmë rrjetet e infrastrukturës, do të thellojmë inovacionin dhe reformën e integruar të institucioneve dhe do të promovojmë integrimin e thellë të transportit, logjistikës dhe ekonomisë",- tha Liu.
Sipas Zhai Kun, një profesor në Shkollën e Studimeve Ndërkombëtare në Universitetin e Pekinit, përparimi i korridorit tregtar jo vetëm që pasqyron qëndrueshmërinë, potencialin dhe vitalitetin e ekonomisë së Kinës, por gjithashtu mishëron konceptin e një komuniteti me një të ardhme të përbashkët për njerëzimin.
