Shefi i OKB (Foto Xinhua)
Sekretari i përgjithshëm i OKB-së, Antonio Guterres, përshëndeti vendimin e Rusisë për të zgjatur me dy muaj Nismën e Drithërave të Detit të Zi, e cila lejon eksportin e drithit ukrainas dhe produkteve të tjera bujqësore nga portet e Detit të Zi.
“E mirëpres këtë vendim. Vazhdimi i marrëveshjes është një lajm i mirë për botën”,- tha Guterres në një konferencë shtypi në selinë e OKB-së në Nju Jork, citon “Xinhua”.
Sipas tij, çështjet e pazgjidhura mbeten, por përfaqësuesit e Rusisë, Ukrainës, Turqisë dhe Kombeve të Bashkuara do të vazhdojnë t'i diskutojnë ato. “Shpresoj se do të arrijmë një marrëveshje gjithëpërfshirëse për të përmirësuar, zgjeruar dhe shtrirë iniciativën, siç propozova në një letër të fundit drejtuar presidentëve të tre vendeve”,- theksoi shefi i OKB-së, duke shtuar se marrëveshja ka rëndësi për sigurinë globale të ushqimit, pasi produktet ukrainase dhe ruse ushqejnë botën.
Nën Iniciativën e Drithërave të Detit të Zi, janë eksportuar më shumë se 30 milionë tonë ushqime. Furnizimet jetike të ushqimit po arrijnë disa nga njerëzit dhe vendet më të cenueshme në botë, duke përfshirë 30.000 tonë grurë që sapo u larguan nga Ukraina për të ushqyer njerëzit e uritur në Sudan, tha shefi i OKB-së.
Guterres vuri në dukje se gjatë vitit të kaluar, tregjet globale të ushqimit janë stabilizuar, paqëndrueshmëria është ulur dhe çmimet globale të ushqimeve ranë me 20 për qind.
“Ne shpresojmë që eksportet e ushqimit dhe plehrave nga Rusia dhe Ukraina do të jenë në gjendje të arrijnë zinxhirët e furnizimit global në mënyrë të sigurt dhe të parashikueshme, siç parashikohet në marrëveshjen e drithërave dhe në memorandumin e mirëkuptimit me Rusinë, për eksportet e ushqimeve dhe plehrave”,- tha Guterres.
Në korrik 2022, Rusia dhe Ukraina nënshkruan veçmas një dokument në Stamboll me Turqinë dhe Kombet e Bashkuara mbi eksportet e grurit dhe plehrave nga Ukraina dhe Rusia, për të siguruar furnizimet në tregjet globale në mes të krizës në Ukrainë.
Marrëveshja fillestare 120-ditore u zgjat me 120 ditë të tjera në nëntor 2022 dhe më pas me 60 ditë në mars 2023. (Elona)
