Foto nga VCG

Komisionerja e BE-së për Inovacionin, Kërkimin, Kulturën, Arsimin dhe Rininë, Mariya Gabriel, u caktua kryeministre për qendrën e djathtë në Bullgari, njoftoi kreu i partisë konservatore GERB, ish-kryeministri bullgar Bojko Borissov.

“Gabriel do të ketë mandatin për të kërkuar një aleancë me partitë e tjera për të formuar një qeveri në Bullgari”, tha Borissov, përcjell “ATSH”.

Borisov tha gjithashtu se bisedimet do të përqendrohen në sigurimin e votave të nevojshme për të emëruar me sukses një qeveri të re të udhëhequr nga GERB.

Partia e qendrës së djathtë fitoi 69 vende në zgjedhjet e fundit parlamentare, shumë më pak se 121 vendet e nevojshme për të formuar një shumicë.

Kjo do të thotë se Gabriel, nëse ka sukses në ofertën e saj, do të udhëheqë një qeveri koalicioni me parti të të njëjtit mendim.

Pas mbërritjes së Ursula von der Leyen në Bruksel, Gabrielit iu caktua një portofol i përforcuar për Inovacionin, Kërkimin, Kulturën, Arsimin dhe Rininë, i cili përfshin programin “Horizon Europe” dhe shkëmbimin e studentëve të programit “Erasmus”, bën të ditur “Euronews Bulgaria”.

Presidenti i EPP-së, Manfred Weber, tha se Gabriel kishte përvojën dhe autoritetin ndërkombëtar për të kapërcyer ngërçin politik në Bullgari.

Politika bullgare ka vuajtur nga paqëndrueshmëria gjatë viteve të fundit duke kaluar nëpër katër kryeministra të ndryshëm, përfshirë Borissovin dhe pesë zgjedhje parlamentare që nga viti 2021. (Irma)