Foto nga VCG

Kina do të mbajë një qëndrim të ashpër ndaj peshkimit të paligjshëm si nga anijet vendase ashtu edhe nga ato të huaja në ujërat e saj bregdetare gjatë moratoriumit të peshkimit veror, i cili filloi të hënën dhe do të zgjasë deri në mes të gushtit në shumicën e zonave, thanë autoritetet, citon “China Daily”.  

Ndalimi do të respektohet në disa zona të veriut, lindjes dhe jugut të vendit për të ruajtur rezervat e peshkut të detit, njoftoi Ministria e Bujqësisë dhe Çështjeve Rurale.  

Në deklaratë thuhet se moratoriumi është një ndër përpjekjet më me ndikim të vendit për ruajtjen e peshkut të detit. Të hënën, ministria nisi gjithashtu një operacion të zbatimit të ligjit në bashkëpunim me Ministrinë e Sigurisë Publike dhe Rojet Bregdetare të Kinës në ujërat jashtë brigjeve të provincave Shandong dhe Fujian dhe Rajonin Autonom Guangxi Zhuang.  

Kina ka vendosur ndalimin vjetor në Detin e Kinës Jugore që nga viti 1999, si pjesë e përpjekjeve për të promovuar zhvillimin e qëndrueshëm të peshkimit detar dhe për të përmirësuar ekologjinë detare.  

Në mes të moratoriumit do të zhvillohen tre veprime përmbarimore në Gjirin Beibu, grykëderdhjen e lumit Pearl dhe përgjatë kufirit detar midis provincave Fujian dhe Guangdong, në përpjekje për të goditur peshkimin e paligjshëm dhe për të mbrojtur burimet detare.  

Ndalimi do të përfundojë më 1 shtator për Detin e Verdhë dhe Detin Bohai, por do të zgjasë deri më 16 shtator në Detin e Kinës Lindore në varësi të rrjetave të peshkimit në përdorim.  

Sipas autoriteteve në Qingdao, Shandong, ndalimi prek 17.000 peshkatarë. Për herë të parë, qyteti do të japë subvencione për ruajtjen e detit prej rreth 70 milionë juanë (10.6 milionë dollarë).