Foto nga ATSH

Produktet shqiptare po prezantohen në panaire të ndryshme në Europë. Më i fundit do të jetë panairi “Slow Food” 2023 në Shtutgart, Gjermani.

Ministrja e Bujqësisë dhe Zhvillimit Rural, Frida Krifca, ndërsa njoftoi pjesëmarrjen e 11 prodhuesve shqiptarë në këtë panair, përmes një postimi në rrjetet sociale, deklaroi se ushqimi shqiptar duhet të promovohet si pasaportë e rëndësishme e traditës, cilësisë, shijes dhe ritualeve të territoreve më të thella të Shqipërisë.

Sipërmarrjet agroturistike në vend po zhvillojnë traditën e “ushqimit të ngadaltë” shqiptar, i cili ka të bëjë me mbajtjen e gjërave që konsumohen në vend, të qëndrueshme dhe të shëndetshme. Ata e bëjnë këtë duke promovuar ushqim të pastër dhe të drejtë dhe biodiversitet, shkruan “ATSH”.

Rilidhja e prodhuesve të ushqimit me ata që konsumojnë ushqimin është një element tjetër i rëndësishëm i lëvizjes së “ushqimit të ngadaltë”. Është një nocion i fuqishëm që mund të ndryshojë perspektivën se si duhet të prodhojmë dhe konsumojmë ushqim. (Irma)