Foto nga VCG

Qeveria ruse ka vendosur të zgjasë funksionimin e segmentit të saj në Stacionin Ndërkombëtar të Hapësirës (ISS) deri në vitin 2028, njoftoi Yuri Borisov, kreu i agjencisë ruse të hapësirës “Roscosmos”, gjatë një takimi me presidentin Vladimir Putin, citoi agjencia ruse e lajmeve “Interfax”, përcjell “Xinhua”.

“Roscosmos” propozoi të enjten e kaluar që qeveria ruse ta zgjaste shërbimin në ISS deri në vitin 2028.

Sipas “Roscosmos”, vendimi ishte shqyrtuar dhe miratuar nga Këshilli Shkencor dhe Teknik i korporatës dhe Komisioni Shtetëror.

Vladimir Solovyev, projektuesi kryesor i anijeve kozmike dhe sistemeve të drejtuara në ndërmarrjen ruse të raketave hapësinore “RSC Energia”, tha se ekspertët rusë kanë kryer një sërë punësh riparimi në segmentin rus të ISS në dy vitet e fundit dhe aktuale gjendja e stacionit e lejon atë të funksionojë deri në vitin 2028.

Marrëveshja aktuale për funksionimin e ISS do të skadojë në vitin 2024. Rusia kishte njoftuar më parë synimin e saj për t'u tërhequr nga projekti pas vitit 2024, pa një datë të saktë të specifikuar.

Borisov tha më herët se dalja nga projekti ISS duhet të sinkronizohet me vendosjen e një stacioni të ri hapësinor rus. (Irma)