Foto nga VCG
Shtëpia e Bardhë publikoi një përmbledhje prej 12 faqesh se si qeveria e trajtoi tërheqjen e trupave amerikane nga Afganistani në vitin 2021, njofton “CGTN”.
Raporti theksoi se vendimi i presidentit amerikan Joe Biden për t'i dhënë fund luftës më të gjatë në historinë amerikane dhe tërheqjen e trupave ishte gjëja e duhur për vendin dhe theksoi se si veprimet e administratës Bidenit ishin të kufizuara rëndë nga kushtet e krijuara nga paraardhësi i tij, Donald Trump.
Ai pranon se evakuimet duhet të kishin filluar më herët dhe komunikimet për rreziqet dhe paralajmërimet për evakuime të mundshme mund të kishin qenë më agresive. Ai fajëson për vonesat qeverinë afgane dhe ushtrinë e saj dhe vlerësimin optimist nga ushtria dhe komuniteti i inteligjencës amerikane.
Ish-presidenti Donald Trump iu përgjigj raportit duke thënë se administrata e Biden po bën një lojë të re dezinformimi për të shkëputur vëmendjen nga dorëzimi i tyre jashtëzakonisht i paaftë në Afganistan. Trump deklaroi në rrjetet sociale se vetëm Biden është përgjegjës dhe askush tjetër.
Mediat amerikane dhe ligjvënësit republikanë vunë në pikëpyetje objektivitetin e raportit, sepse dokumenti ishte përgatitur nga Këshilli i Sigurisë Kombëtare i Shtëpisë së Bardhë dhe jo nga një ent i pavarur. Rishikimet e detajuara pas veprimit të përfunduara nga Departamenti i Shtetit dhe Pentagoni u ndanë me Kongresin dhe nuk do të publikohen.
Zëdhënësi i Sigurisë Kombëtare të Shtëpisë së Bardhë, John Kirby, mbrojti vendimin e administratës për tërheqjen e trupave amerikane nga Afganistani.
Kirby tha në një konferencë shtypi se qëllimi i raportit ishte të kuptonte se çfarë ndodhi dhe mos të fajësonte askënd. Ai gjithashtu theksoi se përfundimi i luftës nuk do të ishte kurrë i lehtë.
Inspektori i Përgjithshëm Special i qeverisë amerikane kreu një rishikim në shkurt mbi atë që shkaktoi kolapsin e shpejtë të forcave afgane të sigurisë. “Për shkak të varësisë së forcës afgane të sigurisë nga forcat ushtarake amerikane, vendimi për të tërhequr të gjithë personelin ushtarak amerikan dhe për të reduktuar në mënyrë dramatike mbështetjen e SHBA-së ndaj Forcave afgane të Sigurisë shkatërroi moralin e ushtarëve dhe policisë afgane”, thuhet në raport, duke fajësuar kolapsin në administratën Trump dhe Biden. (Fatosi)
