Në qytetin Heze në provincën e Shandong-ut, i njohur si "kryeqyteti i lulëgjakeve" i Kinës, është përuruar një qendër tregtare e luleve të freskëta, në një bashkëpunim strategjik me tregun më të madh të luleve të freskëta të Azisë, Qendrën Ndërkombëtare të Tregtimit me Ankand të Florës në provincën jugperëndimore të Kinës Yunnan.

Qendra tregtare e Heze-së do të përqendrohet kryesisht te lulëgjaket, duke siguruar bimë të tilla të prera të cilësisë së lartë nëpërmjet furnizimit  dhe menaxhimit logjistik me standard të lartë. Në vitet e fundit, tregu i konsumit të luleve të prera të freskëta priret drejt produkteve të nivelit të lartë, duke përfshirë lulëgjaket. Kjo lule ka ofruar një mundësi për zhvillimin e tregut të luleve të prera të freskëta.

Heze ka një histori të kultivimit të lulëgjakeve që shkon më shumë se 1 500 vjet më parë dhe është kthyer në bazën më të madhe të Kinës për prodhimin, studimin, eksportin dhe shikimin e lulëgjakeve, duke pasur llojet më të larmishme të tyre në botë.

Sektori i kultivimit të lulëgjakeve në Heze, me plantacione që kanë një sipërfaqe të përgjithshme prej 32 000 hektarësh, krijoi afro 10.2 miliardë juanë (rreth 1.5 miliardë dollarë) të ardhura në vitin 2022. Produktet e lulëgjakeve eksportohen në mbi 30 vende e rajone të botës, duke përfshirë Shtetet e Bashkuara, Francën, Gjermaninë dhe Japoninë.