Hungaria (Foto Xinhua)
Qeveria e Hungarisë nuk dëshiron që NATO të bëhet një bllok kundër Kinës. Deklarata u bë nga ministri i Jashtëm, Peter Szijjarto, të mërkurën, në mbyllje të një takimi të ministrave të Jashtëm të NATO-s në Bruksel.
Sipas tij, në vend të rivalitetit, nevojitet bashkëpunim reciprokisht i dobishëm, citon “Xinhua”.
Sipas Szijjarto, marrëdhënia midis NATO-s dhe Kinës nuk duhet të përshkruhet si ushtarake në natyrë.
“Ne nuk duam që NATO të bëhet një bllok kundër Kinës. Ne nuk e shohim domethënien e rivalitetit, nuk e shohim logjikën e tij dhe nuk shohim se çfarë të mira mund të dalin prej tij”,- tha ai.
Në vend të rivalitetit, qeveria e Hungarisë është e interesuar për një bashkëpunim reciprok të dobishëm, për të cilin ai tha se ishte jo vetëm i mundur, por edhe i nevojshëm.
“Të gjithë ata që bëjnë thirrje për ndarjen e ekonomisë kineze nga ajo evropiane rrezikojnë t'i japin një goditje të madhe ekonomisë evropiane”,- tha ai.
Pa bashkëpunimin kino-evropian nuk ka industri të re automobilistike evropiane dhe as mbrojtje të suksesshme mjedisore evropiane, paralajmëroi ai.
Szijjarto trajtoi gjithashtu planin e paqes të Kinës për Ukrainën, për të cilin ai besonte se mund të ishte një pikënisje e përshtatshme për negociatat ndërkombëtare.
“Ne duam që bisedimet e paqes të fillojnë sa më shpejt të jetë e mundur, sepse sa më shpejt të ketë një armëpushim, aq më shumë jetë mund të shpëtojmë në Ukrainë”,- tha ai. (Elona)