Panairi i Kantonit (Foto China Daily)

Kompanitë daneze shohin potencial të madh në tregun kinez, me Panairin e ardhshëm të Kantonit në Guangzhou që ofron një portë mundësish.

Në një konferencë promovimi në Kopenhagë për Panairin e 133-të të Kantonit, Jens Holst-Nielsen, drejtor i Zhvillimit të Tregut Global në Konfederatën e Industrisë Daneze (DI), tha se panairi u ofron kompanive daneze një mundësi për të hyrë në tregun e madh dhe fitimprurës kinez dhe gjithashtu ofron akses në tregun global, shkruan  “Xinhua”.

Me pjesëmarrjen e 60 përfaqësuesve nga komuniteti danez i biznesit, në konferencë u diskutuan pikat kryesore të Panairit të Kantonit 2023, i planifikuar të zhvillohet si në internet ashtu edhe me prani fizike më 15 prill. Ata diskutuan gjithashtu potencialin për zgjerimin e tregtisë dypalëshe Kinë-Danimarkë.

Gao Xingle, këshilltar Ekonomik dhe Tregtar i Ambasadës Kineze në Danimarkë, u bëri thirrje kompanive daneze të shfrytëzojnë mundësitë e paraqitura nga panairi numër një i Kinës.

VCG

Ndërkohë, Xu Bing, zëvendësdrejtori i përgjithshëm i Qendrës së Tregtisë së Jashtme të Kinës, u kujtoi delegatëve se Panairi i Kantonit kishte qenë prej kohësh një lojtar i rëndësishëm në promovimin e tregtisë së jashtme dhe shkëmbimit ekonomik kinez me pjesën tjetër të botës.

“Meqë Kina është një treg super i madh konsumi, produktet dhe shërbimet daneze gëzojnë potencial të madh”,- tha Xu.

Ai vuri në dukje se masat për mbrojtjen e të drejtave të pronësisë intelektuale (IPR) dhe zgjidhjes së kontesteve tregtare ishin përmirësuar, për të ofruar garanci të sigurisë për transaksionet.

Panairi i 133-të i Kantonit do të mbahet në Kompleksin e Panairit të Kantonit Guangzhou dhe do të zgjasë deri më 5 maj. (Irma)