Foto nga VCG 

Trenat e pasagjerëve dhe mallrave rifilluan gradualisht shërbimin në Greqi të mërkurën, tre javë pas aksidentit tragjik që rezultoi me 57 të vdekur.

Pas një rishikimi të masave të sigurisë, operacionet do të rikthehen plotësisht në prill, tha Panagiotis Terezakis, drejtori ekzekutiv i përkohshëm i Organizatës Helenike Hekurudhore (OSE), pasi treni i parë u nis nga stacioni hekurudhor qendror i Athinës, njoftoi transmetuesi “ERT”, citon “Xinhua”.

“Ne do të bëjmë çdo gjë të mundshme njerëzore për të rifituar besimin e udhëtarëve, duke qenë se hekurudha është mënyra më miqësore me mjedisin e transportit”, tha ai.

Qeveria ka premtuar një hetim të thelluar për shkaqet e përplasjes mes dy trenave, njëri me pasagjerë dhe tjetri mallrash më 28 shkurt, si dhe një përmirësim të rrjetit hekurudhor.

Derisa të instalohen sistemet moderne të sigurisë, trenat do të lëvizin me shpejtësi më të ngadaltë përgjatë pjesëve specifike të rrjetit dhe numri i stafit do të rritet, tha Terezakis.

Natën e aksidentit, një drejtues stacioni ishte në detyrë në stacionin më të afërt hekurudhor. Ai dhe tre punëtorë të tjerë hekurudhor janë akuzuar për vrasje nga pakujdesia.

Pezullimi i funksionimit të trenave të mallrave nuk ka shkaktuar probleme të mëdha për sipërmarrjet greke deri më tani, por funksionimi i një rrjeti hekurudhor të sigurt dhe të besueshëm është i një rëndësie kritike, tha për “Xinhua” Giorgos Karanikas, president i Konfederatës Helenike të Tregtisë dhe Sipërmarrjes (ESEE). (Irma)