Foto nga VCG

Presidenti i Turqisë, Recep Tayyip Erdogan, kërkoi falje për vonesat në reagimin fillestar të autoriteteve pas tërmeteve shkatërruese të 6 shkurtit, ndërsa vizitoi një nga zonat më të prekura nga tërmetet prej 7.8 dhe 7.5 ballësh.  

Erdogan, që po kërkon edhe një mandat tjetër si president pas dy dekadash në pushtet, u përball me kritika të ashpra nga të mbijetuarit e tërmeteve në Adëjaman, në juglindje të Turqisë, shkruan “RTSH”.  

Në zgjedhjet e fundit të mbajtura më 2018-n, Erdogan në këtë provincë kishte fituar pa problem.  

“Për shkak të efektit shkatërrues të dridhjeve të tokës dhe motit të keq, ne nuk ishim në gjendje të punonim siç do të donim në Adëjman në ditët e para pas tërmeteve. Ju kërkoj falje për këtë”, tha Erdogan.  

Nga tërmetet e 6 shkurtit kanë humbur jetën mbi 44.000 mijë persona në Turqi dhe mijëra të tjerë në Sirinë fqinje. Agjencia e lajmeve “AFP” kishte raportuar se qytetarët e Adëjmanit kishin shprehur zemërimin e tyre ndaj autoriteteve për shkak të vonesave në operacionet e kërkim-shpëtimit.  

Erdogan, disa ditë pas tërmeteve, kishte pranuar se autoritetet nuk kishin reaguar siç duhej pas kësaj fatkeqësie natyrore. (Elona)