Një mision i përbashkët hapësinor Kinë-Europë, “Solar Wind Magnetosphere Lionosphere Link Explorer” (SMILE), ka përfunduar me sukses një test rakete satelitore, sipas Qendrës Kombëtare të Shkencave Hapësinore (NSSC) nën Akademinë Kineze të Shkencave (CAS), shkruan “Xinhua”.

Një ekip satelitor kinez nga misioni SMILE udhëtoi së fundi në Qendrën Europiane të Kërkimit dhe Teknologjisë Hapësinore (ESTEC) të Agjencisë Europiane të Hapësirës (ESA) për të kryer një test prototip të përbashkët satelit-raketë, duke përfunduar vëzhgimin, ndarjen satelitore dhe testet e ndikimit, njoftoi NSSC-ja.

Ekipi satelitor kinez dërgoi tre modulet e prototipit të satelitit SMILE në ESA në dhjetor 2022 dhe përfundoi punën e montimit, integrimit dhe përgatitjes në ESTEC.

Ky ishte aktiviteti i parë i shkëmbimit në terren i ekipeve të dy palëve që nga shqyrtimi i projektimit të prototipit të nivelit të misionit SMILE, i kryer në janar 2020.

SMILE është një mision shkencor bashkëpunues midis CAS dhe ESA për të ndërtuar një kuptim më të thellë të lidhjes Diell-Tokë duke vëzhguar ndërveprimin dinamik midis erës diellore dhe magnetosferës së Tokës.

Përveç CAS dhe ESA, në test morën pjesë edhe kompani si “Arianespace” dhe “Airbus”.

Ekipi i misionit SMILE do të shkojë në Spanjë në prill dhe në Gjermani në maj dhe shtator, për të kryer teste me homologët europianë. Sateliti i misionit është planifikuar të shkojë në hapësirë në vitin 2025. (Irma)