Foto nga VCG

Zelanda e Re do të sigurojë fonde të mëtejshme humanitare dhe asistencë teknike për të mbështetur përpjekjet e ndihmës në Turqi dhe Siri pas tërmeteve vdekjeprurëse.

“Ne do të kontribuojmë me 3 milionë dollarë të tjerë të Zelandës së Re (1.9 milionë dollarë amerikanë) në fonde humanitare për të mbështetur përpjekjet e reagimit në terren”,- deklaroi ministri i Jashtëm, David Parker, citon “Xinhua”.

Ndër to, 2 milionë dollarë do të shpërndahen përmes Programit Botëror të Ushqimit (WFP) në Turqi, duke ofruar ndihmë të menjëhershme për familjet e zhvendosura në një mjedis jashtëzakonisht sfidues që përkeqësohet nga temperaturat e ulëta, tha Parker.

“Kontributi ynë do të mbështesë WFP-në për të ofruar ndihmë jetike ushqimore për komunitetet, duke përfshirë paketat ushqimore familjare”,- tha ai.

1 milion dollarë të tjerë do të shkojnë për të mbështetur përgjigjen e Fondit të Kombeve të Bashkuara për Fëmijët (UNICEF) në Siri. UNICEF-i po ofron mbështetje shëndetësore, ushqimore, arsimore dhe psikosociale për fëmijët dhe të rinjtë e prekur nga tërmeti, tha Parker.

Përveç këtyre kontributeve të reja financiare, dy specialistë të menaxhimit të informacionit të urgjencës dhe zjarrit të Zelandës së Re po punojnë për të ndihmuar në koordinimin e përpjekjeve ndërkombëtare të kërkim-shpëtimit në terren në Turqi, tha ai, duke shtuar se këta individë po punojnë jashtë Zelandës së Re si pjesë të një ekipi ndërkombëtar. (Irma)