VCG
Kompanitë nga Kina dhe Lindja e Mesme kanë shtuar shumë programe për të forcuar tregtinë dypalëshe dhe për të thelluar bashkëpunimin në shumë fusha. Drejtuesit e biznesit dhe vëzhguesit e tregut thonë se fuqia e fortë blerëse në Lindjen e Mesme, efektiviteti i kostove të Kinës dhe besueshmëria e zinxhirit të furnizimit po shtyjnë një numër në rritje të kompanive nga të dyja palët që në vitet e fundit të orientohen në fusha si logjistika moderne, rritja e gjelbër, tregtia në shërbime dhe bizneset e tregtisë elektronike ndërkufitare.
VCG
Të nxitur nga lidhjet më të ngushta të biznesit dhe politikës, kompanitë nga Kina dhe Lindja e Mesme kanë shtuar shumë programe në fushat e logjistikës dhe zhvillimit të infrastrukturës për të forcuar tregtinë dypalëshe dhe për të thelluar bashkëpunimin në tregtinë elektronike ndërkufitare, thonë drejtuesit e biznesit dhe vëzhguesit e tregut.
Sipas tyre, fuqia e fortë blerëse në Lindjen e Mesme, efektiviteti i kostove të Kinës dhe besueshmëria e zinxhirit të furnizimit po shtyjnë një numër në rritje të kompanive nga të dyja palët që në vitet e fundit të orientohen në fusha si logjistika moderne, rritja e gjelbër, tregtia në shërbime dhe bizneset e tregtisë elektronike ndërkufitare.
“Ajlan & Bros Holding Group”, ose “ABHG”, një konglomerat me bazë në Arabinë Saudite, planifikon të zgjerojë praninë e saj në më shumë tregje logjistike në Lindjen e Mesme duke bashkëpunuar me partnerët e saj kinezë.
“AJEX Logistics Services”, një sipërmarrje e përbashkët midis “ABHG” dhe ofruesit kinez të shërbimeve logjistike “SF Express”, njoftoi në fund të janarit se kishte nisur disa shërbime të reja për klientët në Emiratet e Bashkuara Arabe në përputhje me planet e saj strategjike të rritjes.
Klientët e saj aktualisht janë në gjendje të shijojnë shërbime të integruara logjistike vendase dhe ndërkombëtare, që lidhin klientët biznes-biznes dhe biznes-me-konsumator në Emiratet e Bashkuara Arabe, tregjet e Këshillit të Bashkëpunimit Kinë-Gjir dhe ndërkombëtarisht.
Me seli në Riad, Arabi Saudite, “GCC” është një bashkim politik dhe ekonomik i gjashtë shteteve arabe që kufizohen me Gjirin Persik. Vendet janë Bahreini, Kuvajti, Omani, Katari, Arabia Saudite dhe Emiratet e Bashkuara Arabe, disa prej të cilave konsiderohen ndër vendet kryesore në botë për eksportet e karburanteve fosile.
Shërbimet e reja të disponueshme përfshijnë zgjidhje ekspres vendase dhe të tregtisë elektronike, të cilat ofrojnë shërbime në të shtatë emiratet për klientët B2B dhe B2C brenda Emirateve të Bashkuara Arabe, shërbim ekspres ndërkombëtar në rrugët që lidhin Emiratet e Bashkuara Arabe me Bahreinin dhe Arabinë Saudite, si dhe shërbime ndërkombëtare rrugore për “GCC”, Egjiptin dhe Jordaninë, përveç zgjidhjeve të transportit të mallrave në mbarë botën dhe zinxhirit të ftohtë.
Planet e zgjerimit të “AJEX” për vitin 2023 në Emiratet e Bashkuara Arabe përfshijnë hapjen e një objekti të katërt të vendosur pranë Aeroportit Ndërkombëtar të Dubait, për të mbështetur operacionet e tij dhe shtimin e 50 automjeteve të tjera në flotën e saj deri në fund të tremujorit të parë. Kompania planifikon të zgjerojë flotën e saj në 100 automjete deri në fund të vitit 2023.
“Që nga fillimi i operacioneve tona në Emiratet e Bashkuara Arabe në vitin 2022, kemi ndjekur një strategji të guximshme rritjeje si pjesë e planeve tona më të gjera të zgjerimit të Lindjes së Mesme”,- tha Nabeel Alkharabsheh, menaxher i përgjithshëm në “AJEX Logistics Services” për Emiratet e Bashkuara Arabe.
Me zgjidhjet operacionale të pjekura dhe praktike të ofruara nga “SF Express”, ai tha se “AJEX” ka demonstruar forcën e operacioneve dhe ekspertizës logjistike, duke siguruar me sukses një bazë klientësh në sektorë të ndryshëm, duke përfshirë tregtinë elektronike, shitjen me pakicë të fushës së modës, elektronikë, kozmetikë, automobila dhe ndërtim në Emiratet e Bashkuara Arabe.
VCG
“Me shkëmbimet gjithnjë e më të ngushta ekonomike dhe tregtare midis Arabisë Saudite dhe Kinës, ne mezi presim të kryejmë shkëmbime të thelluara me më shumë kompani kineze, si dhe të forcojmë bashkëpunimin në fusha në zhvillim si 5G, inteligjenca artificiale, të dhënat e mëdha, bioteknologji, teknologjia financiare dhe automatizimi”,- tha Mohammed Bin Abdulaziz Alajlan, zv.president i “ABHG”.
Kina ka qenë e prirur të ndihmojë Arabinë Saudite në hartimin e një rruge të re të diversifikimit ekonomik dhe sinergjisë së nismës “Një brez, një rrugë”, pasi qeveria zbuloi Vizionin Saudit 2030 në vitin 2016.
Kuadri strategjik i vendit arab synon të ulë varësinë nga nafta dhe ta transformojë mbretërinë në një central elektrik kryesor industrial dhe një qendër tregtare globale, tha Lin Meng, drejtoreshë e Institutit Modern të Kërkimeve të Zinxhirit të Furnizimit, pjesë e Akademisë së Tregtisë Ndërkombëtare dhe Bashkëpunimit Ekonomik të Kinës, me qendër në Pekin.
Për shembull, Porti i Mbretit Abdulaziz në Dammam, në Arabinë Saudite, u përfshi në “Gulf China Service” në dhjetor 2021, një shërbim javor që lidh Kinën qendrore dhe jugore me rajonin e Gjirit, i lançuar nga “Singapore's Pacific International Lines”, në nëntor 2021.
Masa, që synon rritjen e konkurrencës së portit dhe rritjen e tregtisë midis dy vendeve, ka forcuar në mënyrë efektive lidhjet detare dhe ka gjeneruar më shumë mundësi investimi dhe bashkëpunimi me ekonomitë e tjera të “Një brez, një rrugë”, tha ajo.
“Kina dhe shtetet arabe janë partnerë të natyrshëm për bashkëpunimin “Një brez, një rrugë” dhe gëzojnë perspektiva të gjera bashkëpunimi, pasi ato janë shumë komplementare në tregti dhe ekonomi”,- tha Mao Xiaojing, drejtor i Institutit për Studimet e Azisë Perëndimore dhe Afrikës nën Akademinë e Tregtisë Ndërkombëtare dhe Bashkëpunimit Ekonomik të Kinës.
