Foto nga VCG
Gjigantët amerikanë të teknologjisë së lartë kanë pësuar rënie të mprehtë në të ardhurat neto në tremujorin që përfundoi më 31 dhjetor 2022, krahasuar me përparimin e shpejtë që kanë bërë në vitet e fundit, sipas raporteve më të fundit financiare tremujore, njofton “Xinhua”.
Fitimi neto i “Meta”, kompania mëmë e “Facebook”, në tremujorin e katërt të 2022-shit ishte 4.65 miliardë dollarë amerikanë, duke u ulur me 55 për qind nga viti në vit.
Të ardhurat neto tremujore të “Alphabet”, kompanisë mëmë të “Google”, ishin afërsisht 13.6 miliardë dollarë, duke rënë 34 për qind.
“Amazon” raportoi një humbje neto prej 2.7 miliardë dollarësh për vitin e plotë 2022, rezultati më i keq në historinë e kompanisë.
Të ardhurat tremujore të gjigantit të industrisë së çipave Intel ranë rreth 32 për qind krahasuar me të njëjtën periudhë të vitit 2021, me një humbje neto prej 661 milionë dollarësh.
Fitimi neto tremujor i “Microsoft” ra 12 për qind nga viti në vit, më i ulët se pritshmëritë e tregut.
Të ardhurat e “Apple” gjatë tremujorit ranë me 5 për qind, rënia e parë nga viti në vit që nga viti 2019, me tkurrje të të ardhurave në të gjitha rajonet.
Analistët e industrisë thanë se pengesa kolektive e gjigantëve të teknologjisë së lartë amerikane nuk është e rastësishme. Ndikimi i faktorëve të shumtë negativë makroekonomikë, vlerësimi i gabuar i perspektivave të zhvillimit të industrisë dhe zgjerimet radikale kanë kontribuar ndjeshëm në përkeqësimin e performancës së këtyre korporatave.
Në mënyrë të veçantë, kërkesa afatgjatë po dobësohet për shkak të dollarit të fortë amerikan, inflacionit të vazhdueshëm, rritjeve të mëtejshme të normave të interesit, rritjes së rreziqeve të recesionit dhe pasigurisë makroekonomike. Të gjithë këta faktorë peshuan në vendimet e konsumatorëve dhe bizneseve për t'u ulur poshtë në përgatitje për një recesion të mundshëm.
Për shembull, dërgesat globale të kompjuterëve personalë u ulën me 16.2 për qind në bazë vjetore në vitin 2022. Në tremujorin e katërt, ajo ra 28.5 për qind nga viti në vit, duke i dhënë një goditje të rëndë prodhuesve të kompjuterëve, prodhuesve të çipave dhe kompanive të softuerëve.
Dollari amerikan gjithashtu dëmtoi performancën e kompanive.
Disa kompani të teknologjisë së lartë, veçanërisht kompanitë e internetit, kanë rekrutuar më shumë punonjës sesa u nevojiten, duke sjellë kosto të rënda. Sipas ekspertëve, përballë më shumë pasigurive makroekonomike dhe presionit të aksionarëve për të reduktuar kostot, shumica e gjigantëve të teknologjisë së lartë pushuan nga puna punonjësit në një shkallë të gjerë, duke formuar një valë fenomenale pushimesh nga puna në të gjithë industrinë. (Fatosi)
