Kina mund të luajë një rol të rëndësishëm në stimulimin e rritjes globale në vitin 2023, tha Hamid Rashid, ekonomist kryesor i Kombeve të Bashkuara, pas publikimit të raportit “Situata Ekonomike Botërore dhe Perspektivat (WESP) 2023”.  

Gjatë një interviste për “Xinhua” ai tha se 2022-shi ishte një vit i vështirë, por këtë vit, Kina mund të luajë një rol shumë të rëndësishëm në stimulimin e rritjes globale.  

Ai shprehu besimin se ekonomia e Kinës do të përjetojë një rimëkëmbje të fortë këtë vit, pasi politikat e saj janë të përafruara saktë, që do të thotë se politika fiskale dhe politikat monetare janë në drejtimin e duhur.  

“Nuk ka pasur shtrëngim të politikës monetare në Kinë, gjë që është mjaft qetësuese sepse kjo ndoshta do të kishte shtypur rritjen ekonomike”,- tha ai.  

Rashid tha se krahasuar me vendet e tjera, Kina ka ende një normë shumë të ulët inflacioni, që është një avantazh i jashtëzakonshëm.  

Kriza financiare globale në vitin 2008 e transformoi Kinën në motorin e ekonomisë globale, kujton Rashid. Rivendosja e rolit të Kinës si motor është një lajm i mirë për shumë vende të tjera në zhvillim, shtoi ai.  

“WESP 2023” paraqet një pamje të zymtë të ekonomisë globale dhe paralajmëron se krizat e shumta dhe të kryqëzuara ka të ngjarë të shtojnë dëme të mëtejshme në ekonominë globale, me rritjen e vendosur të ngadalësohet nga 3 për qind në 2022 në 1.9 për qind këtë vit.  

Rashid theksoi nevojën për të investuar në kapacitetin prodhues, për të promovuar kapitalin njerëzor dhe për të luftuar ndryshimet klimaterike, duke shtuar se duke bërë këto investime, bota do të dalë nga periudha e vështirë. (Elona)