Foto nga VCG
Tre të katërtat e njerëzve më të varfër në botë jetojnë në zonat rurale të vendeve në zhvillim. Shumica e tyre varen nga bujqësia për jetesën. Ndryshimet klimatike, rritja e popullsisë globale dhe çmimet e paqëndrueshme të ushqimit dhe energjisë kanë potencialin të shtyjnë miliona njerëz më të cenueshëm në varfëri ekstreme dhe uri deri në vitin 2030. Në një intervistë për agjencinë e lajmeve “Xinhua”, kreu i Fondit Ndërkombëtar për Zhvillimin e Bujqësisë, Alvaro Lario, paralajmëroi se kriza e vazhdueshme e ushqimit do të vazhdojë të përkeqësohet këtë vit, ndaj nevojiten më shumë investime. Sipas Larios, në këtë situatë të krizës globale, Kina mund të shërbejë si shembull se si të zhduket varfëria absolute.
Kreu i Fondit Ndërkombëtar për Zhvillimin e Bujqësisë (IFAD) paralajmëroi në Forumin Ekonomik Botëror në Davos se kriza e vazhdueshme e ushqimit ka të ngjarë të vazhdojë këtë vit. “Për vitin 2023, ne nuk presim një situatë më të mirë se për vitin 2022. Disa nga mangësitë në zinxhirët e furnizimit global që kemi parë në vitin 2022 do të kenë ndikim edhe këtë vit”, - tha presidenti i Fondit Ndërkombëtar për Zhvillimin e Bujqësisë, Alvaro Lario, për “Xinhua”.
"Ne po punojmë me shumë nga partnerët tanë për të parë se si të zhbllokojmë gjithashtu situatën e plehrave. Megjithatë, për vitin 2023, duke pasur parasysh sezonin e mbjelljes në 2022-shin, nuk do të ketë shumë lajme të mira",- tha ai.
Presidenti Lario tha se edhe pse po ndërmerren veprime për të adresuar krizën ushqimore, ato mezi mjaftojnë dhe do të nevojiten më shumë investime.
"Ne po shohim që shumë nga pronarët e vegjël vuajnë për shkak të krizës së kostos së jetesës, aksesit të kufizuar në ushqim dhe pleh. Fatkeqësisht, sezoni i mbjelljes ka humbur",- tha ai. "Megjithatë, ka disa iniciativa në vazhdim se si të adresohen mangësitë e sistemeve ushqimore. Disa prej tyre kanë të bëjnë me taksimin, subvencionet, shpërndarjen dhe prodhimin. Ne jemi duke kërkuar mënyra për të rritur në mënyrë masive investimet që shkojnë në sistemet ushqimore”,- tha ai.
Sipas Fondit Ndërkombëtar për Zhvillimin e Bujqësisë, tre të katërtat e njerëzve më të varfër në botë jetojnë në zonat rurale të vendeve në zhvillim. Shumica e tyre varen nga bujqësia për jetesën. Ndryshimet klimatike, rritja e popullsisë globale dhe çmimet e paqëndrueshme të ushqimit dhe energjisë kanë potencialin të shtyjnë miliona njerëz më të cenueshëm në varfëri ekstreme dhe uri deri në vitin 2030. Sipas raportit "Gjendja e Sigurisë Ushqimore dhe Ushqyerjes" të publikuar nga pesë agjenci të OKB-së, përfshirë Fondin Ndërkombëtar për Zhvillimin e Bujqësisë, korrikun e kaluar, bota po mbetet më mbrapa në përpjekjet për t'i dhënë fund urisë dhe varfërisë në përputhje me Objektivat e Zhvillimit të Qëndrueshëm 2030. Ai tregoi se numri i njerëzve të prekur nga uria globalisht u rrit në 828 milionë në vitin 2021, një rritje prej rreth 150 milionë që nga shpërthimi i pandemisë Covid 19.
ROLI I KINËS
Lario tha gjithashtu se Kina mund të shërbejë si shembull se si të zhduket varfëria absolute. "Kina është një partner i madh për ne në Fondin Ndërkombëtar për Zhvillimin e Bujqësisë”,- tha ai.
Si një vend huamarrës dhe donator, Kina ka luajtur një rol themelor në bashkëpunimin trekëndor jug-jug, tha shefi i Fondit Ndërkombëtar për Zhvillimin e Bujqësisë.
Bashkëpunimi jug-jug i referohet bashkëpunimit midis vendeve në zhvillim në Jugun Global. Kur një bashkëpunim i tillë përfshin mbështetje nga një partner verior, ai quhet bashkëpunim trekëndor.
"Duke pasur parasysh atë që Kina ka përjetuar gjatë dekadave të fundit, ajo është me të vërtetë një shembull i mirë se si të nxirren qindra miliona njerëz nga varfëria. Ne ende punojmë me Kinën për varfërinë rurale dhe ajo ka qenë një aktor themelor për ne",- tha Lario.
Në vitin 2021, Kina shpalli një fitore të plotë në luftën e saj kundër varfërisë, që do të thotë se varfëria absolute është çrrënjosur në vendin më të populluar në botë.
