Gjermania merr komandën e forcave të gatishmërisë së lartë të NATO-s
2022-12-30 10:59:07

Nato (Foto Atsh)

Nato (Foto Atsh)

Më 1 janar 2023, Gjermania do të marrë përsipër komandën e forcave ushtarake të NATO-s, të cilat janë në nivel të lartë të gatishmërisë emergjente.

Task Forca e Përbashkët me Gatishmëri Shumë të Lartë (VJTF) e cila është pjesë e Forcave të Reagimit të NATO-s që u aktivizua për herë të parë në historinë e Aleancës pas konfliktit ruso-ukrainas, përbëhet nga rreth 11.500 ushtarë, shkruan agjencia turke e lajmeve “Anadolu”, citon “ATSH”.

Komandën e forcës në vitin 2021 e kishte Turqia, në vitin 2022 Franca ndërsa gjatë vitit 2023 do ta ketë Gjermania.

Për forcën e cila mbahet në gatishmëri për të ndërhyrë ndaj situatave emergjente brenda disa ditëve, përveç Gjermanisë, kontribut do të ofrojnë edhe Belgjika, Çekia, Letonia, Lituania, Luksemburgu, Holanda, Norvegjia dhe Sllovenia. Gjermania do të kryesojë për herë të parë komandën e Forcave Speciale brenda VJTF.

VCG

VCG

Zëdhënësja e NATO-s, Oana Lungescu tha se nuk duhet të ketë dyshim nga vendosmëria e NATO-s për të ruajtur dhe mbrojtur çdo centimetër katror të territoreve aleate.

VJTF është elementi i parë reagues i NATO-s dhe pjesë kyçe e mbrojtjes tonë kolektive. Udhëheqja e Gjermanisë është tregues i fortë i angazhimit dhe mundësive të saj.

Disa elementë të forcës së gatishmërisë së nivelit të lartë të NATO-s menjëherë pas nisjes së konflitit ruso-ukrainas në shkurt 2022 u vendosën në Rumani.

VJTF u themelua në vitin 2014 pas zhvillimeve ruso-ukrainase dhe atyre në Lindjen e Mesme. (Irma)