Foto: VCG

Parlamenti grek miratoi buxhetin e shtetit 2023, i cili parashikon 1.8 për qind rritje të prodhimit të brendshëm bruto (PBB) dhe një normë inflacioni prej 5 për qind për këtë vit, njofton “Xinhua”.

Vlerësimet fillestare prej 2.1 për qind dhe 3 për qind respektivisht të dhëna në tetor, u rishikuan në mes të pasigurisë së madhe të vazhdueshme globale për shkak të krizës energjetike, bëri të ditur ministria greke e Financave në një njoftim për shtyp.

Viti 2022 do të mbyllej me 5.6 për qind rritje të PBB-së dhe 9.7 për qind të inflacionit, sipas buxhetit që u miratua me votat e 156 ligjvënësve në seancën plenare prej 300 anëtarësh.

“Rritja ekonomike dhe mirëqenia sociale, reforma të guximshme dhe maturi. Këto janë parimet që përshkojnë buxhetin tonë”,- tha kryeministri grek  Kyriakos Mitsotakis në një fjalim para votimit.

Greqia ka mbështetur shoqërinë për të përballuar rritjen e kostove të jetesës me më shumë se 15.1 miliardë euro (16 miliardë dollarë amerikanë) deri tani, ndërsa më shumë masa mbështetëse do të futen në vitin 2023, njoftoi transmetuesi publik grek “ERT”, duke cituar kryeministrin.

Sipas Mitsotakis, viti 2023 do të regjistrojë suficit primar prej 0.7 për qind të PBB-së. Në vitin 2022, vendi raportoi një deficit prej 1.6 për qind të PBB-së.

“Viti 2022 do të jetë i fundit me deficit primar. Nga viti 2023 ekonomia kthehet në suficit primar”, tha ai. (Fatosi)