Foto nga VCG
Realiteti virtual dhe realiteti i shtuar janë premtuese në Kinë falë avancimit të produkteve harduerike për konsumatorin dhe një ekosistemi me përmbajtje më të bollshme të krijuar nga prodhues të ndryshëm, thonë ekspertët. Në nëntor, Ministria e Industrisë dhe Teknologjisë së Informacionit dhe katër ministri të tjera në Kinë zbuluan një plan për të nxitur zhvillimin e industrisë së realitetit virtual dhe u zotuan se do të bëhen përparime në teknologjitë dhe aplikacionet kryesore deri në vitin 2026.
Një nga skenat më mbresëlënëse në “Ready Player One”, një film fantastiko-shkencor i vitit 2018 nga regjisori i njohur Steven Spielberg, është se protagonisti hyn në botën e të ardhmes me ekrane të montuara në kokë dhe doreza të dhënash haptike.
Në fakt, një mënyrë kaq fantastike për të parë, dëgjuar, prekur dhe ndërvepruar me një botë digjitale nuk është larg. Pajisjet e realitetit virtual, që u mundësojnë përdoruesve të hyjnë në botët virtuale për qëllime lojrash, argëtimi, edukimi dhe pune, bënë debutimin në Pekin së fundmi.
Përmes “Gates01”, përdoruesit mund të shkelin në një sipërfaqe prej afërsisht tre metra katrorë, të vrapojnë lirshëm dhe të ndërveprojnë në lëvizje të gjithanshme për të përjetuar botët digjitale me syze të realitetit virtual, jelek vibrues dhe doreza për kapjen e lëvizjeve.
“Në një farë mënyre, e ardhmja e treguar në film po ndodh tani në vend”,- tha Guo Cheng, themelues dhe drejtor ekzekutiv i prodhuesit kinez të pajisjeve “StepVR”, i cili është gjithashtu prodhuesi i produktit.
“Deri tani, një kufje e thjeshtë mund të shkaktojë probleme të lëvizjes dhe marramendje për shkak të paaftësisë për të rivendosur ndjenjën e ekuilibrit të sistemit vestibular. Krahasuar me shumicën e pajisjeve ekzistuese të realitetit virtual, “Gates01” e ka perfeksionuar atë për të pesta shqisat për sa i përket shikimit, prekjes, nuhatjes, shijimit dhe dëgjimit, duke krijuar një përvojë më të ekuilibruar dhe përfshirëse”,- tha Guo.
Duke u bazuar te përparimet që ka bërë “StepVR”, Kina ka parë investime në rritje në fushën e realitetit virtual dhe tregjet e realitetit të shtuar në vitet e fundit.
Shpenzimet e Kinës në lidhje me teknologjinë e informacionit arritën rreth 2.13 miliardë dollarë vitin e kaluar, sipas konsulencës së tregut “International Data Corp”. Kompania ka parashikuar gjithashtu se deri në vitin 2026, Kina do të jetë tregu i dytë më i madh i realitetit virtual (VR) dhe realitetit të shtuar (AR) në nivel global.
“VR dhe AR janë premtuese në Kinë falë avancimit të produkteve harduerike për konsumatorin dhe një ekosistemi me përmbajtje më të bollshme të krijuar nga prodhues të ndryshëm”,- tha Claire Zhao, analiste në “IDC China”.
Guo nga “StepVR” shtoi se kompania kineze ka nisur gradualisht shpërndarjen e produkteve të saj inovative në Korenë e Jugut, Japoni, Singapor, Lindjen e Mesme, Amerikën e Veriut dhe Evropë, dhe ka lançuar produkte për individë dhe familje në nivel global të parashikuara për gjysmën e parë të vitit të ardhshëm.
E themeluar në vitin 2013, “StepVR” lançoi në Kinë vitin e kaluar markën e realitetit virtual “Future Battlefield”. Në më pak se një vit, “Future Battlefield” kishte hapur më shumë se 140 dyqane dhe kishte akumuluar më shumë se 1 milion përdorues deri në mesin e këtij viti.
“Ne synojmë të lançojmë një produkt të ri VR, me madhësinë e tij të reduktuar me 50 për qind dhe peshën do të jetë më e lehtë, për t'u përshtatur lehtësisht në ambiente të tilla si shtëpitë, palestrat dhe zyrat për përdorim personal”,- tha Guo, duke shtuar se qëllimi është që të krijohet një përvojë gjithëpërfshirëse VR për çdo përdorues.
Në nëntor, Ministria e Industrisë dhe Teknologjisë së Informacionit dhe katër ministri të tjera në Kinë zbuluan një plan për të nxitur zhvillimin e industrisë VR dhe u zotuan se do të bëhen përparime në teknologjitë dhe aplikacionet kryesore deri në vitin 2026.
Sipas planit, shkalla totale e industrisë së realitetit virtual në Kinë, duke përfshirë harduerin, softuerin dhe aplikacionet përkatëse, pritet të kalojë 350 miliardë juanë (50.3 miliardë dollarë) deri në vitin 2026.
Ndërkohë, vendi synon të ketë 100 ndërmarrje me aftësi të forta inovative dhe ndikim në industri, si dhe të rrisë shitjet e terminaleve VR në 25 milionë njësi, thuhet në dokument.
Përveç sektorit të argëtimit, VR dhe AR janë aplikuar gjerësisht në një sërë industrish në Kinë, duke përfshirë kujdesin shëndetësor, arsimin dhe median.
Në Spitalin Huashan të Shangait, realiteti virtual tashmë është përdorur në kirurgjinë endoskopike për të hequr një tumor të trurit nga një pacient. Duke veshur syzet VR, mjekët prenë me sukses dhe me saktësi indet e synuara përmes një prerjeje prej pesë centimetrash të lëkurës. Imazhet holografike 3D të përmirësuara të trurit u projektuan në kohë reale në lëkurën e kokës së pacientit për të treguar vendndodhjet e sakta brenda trurit.
Përveç kësaj, VR ka luajtur gjithashtu një rol të rëndësishëm në drejtimin e industrisë së medias. Gjatë këtij viti, një sërë produktesh VR tashmë kishin bërë një ndryshim pozitiv në detyrat e gazetarëve.
Për shembull, “Leion Pro”, syzet AR dhe VR me 5G dhe inteligjencë artificiale, i lejuan gazetarët të kryenin intervista dhe t'i transmetonin drejtpërdrejt në internet në kohë reale.
Të realizuara nga prodhuesi kinez i syzeve inteligjente “Beijing LLVision Technology Co”, syzet, sipas kompanisë, janë në gjendje të identifikojnë fytyrat nga një bazë të dhënash prej 10.000 në 100 milisekonda.
“Epoka e medies holografike e krijuar nga 5G do të kombinojë realitetin dhe virtualitetin, nga teknologjitë si VR dhe AR, njohja e zërit dhe njohja e fytyrës deri te teknologjitë që lidhen me njohjen e emocioneve dhe llogaritjen emocionale. Me mbështetjen e realitetit virtual dhe realitetit të shtuar, integrimi i inteligjencës dhe industrisë së medias do të avancohet në një nivel më të thellë”,- tha Yang Qiguang, profesor i Shkollës së Gazetarisë dhe Komunikimit në Universitetin Renmin në Pekin.
