Artur Spanjolli është shkrimtar shqiptar. Ai ka mbaruar studimet në Liceun artistik të Durrësit,ndërsa në vitin 1989 shkroi poezitë e para, të cilat i mblodhi në tre vëllime, por arriti t’i publikonte në vitin 1994  në librin me titull “Nata e qiparisave të huaj”, botuar prej Shtëpisë Botuese “Bilal Xhaferri”.

Në vitin 1992 u largua nga Shqipëria si fitues i çmimit "I giovani incontrano l'Europa” (Të rinjtë takojnë Europën), organizuar nga televizioni Italian Rai 3. Arturi vendosi të jetojë në Itali me ëndrra për një jetë më të mirë dhe sidomis për të studiuar në një nga universitetet italiane. Në vitin ai 1993 u regjistrua në Fakultetin e Letërsisë dhe të Filozofisë në Firence të Italisë  ku  u diplomua në vitin 2000, me temën  “Letërsia fantastike në letërsine kontemporane”. Ndërkohë ai ushtron dhe aktivitetin e piktorit në krijimtari të lirë.

Gjatë këtyre viteve të qëndrimit si emigrant në Itali Artur Spanjolli ka shkruar dhe ka botuar disa libra në shqip  dhe  italisht. Ndonëse jeton  në Itali, ai nuk i ka shkëputur marrëdhëniet me Shqipërinë.  Këtë vit ai solli për lexuesin shqiptar  librin e tij të parë në gjuhën shqipe “Gjelat këndonin ndryshe", për të cilin ka zgjedhur të flasë për herë të parë për Grupin Mediatik të Kinës.

CMG: Çfarë mund të thoni për kuptimin e emrit tuaj ?

Artur Spanjolli: Emri im nuk ka asnjë kuptim të veçantë, ky kuptim ka ardhur pasi unë krijova dhe ndërtova emrin tim gjatë karrierës. Nëse do të flisja për mbiemrin, ai ka një histori të veçantë. Të gjithë kanë menduar që kam diçka qe lidhet drejtpërdrejt me Spanjën, por nuk është kështu. Është një rrënjë në fakt nga Kavaja, aty është fisi kryesor. Ka pasur shumë studiues të cilët janë marrë me këtë histori, e vërteta është që bëhet fjalë për vite më parë në shkëmbin e Kavajës, ku spanjollët kanë blerë toka dhe u vendosën aty për të jetuar. Me kalimin e shekujve u shkrinë me popullsinë vendase.

CMG: Artur kanë kaluar shumë vite. Arrini ta shihni veten në pasqyrë për të kuptuar kush jeni ?

Artur Spanjolli: Kjo është një pyetje që duhet të bëhet nga kushdo sepse është e rëndësishme të njohim veten. Shpesh e pyes veten " Ku kam qenë dhe ku dua unë të shkoj? ". Absolutisht që qëllimet janë të pavdekshme dhe rrugëtimi i pandalshëm,  por e rëndësishme është të bëjmë diçka në jetë. Mendoj se kam arritur shumë gjëra në jetë. Nuk kam arritur ato që kam dashur që në moshën 20-vjeçare, por gjithmonë kam pritur pasi ëndrra është e vështirë që të përkojë me realitetin. Shumë kam bërë dhe shumë dua të bëj  E shoh veten në mes të një udhëtimi.

CMG: Çfarë ju lidh me qytetin e Durrësit?

Artur Spanjolli: Kam shumë pak kujtime me qytetin e Durrësit, pasi i largova në moshë të vogël i nxitur nga rrethanat shëndetësore. Të dielat në qytetin e Durrësit me tingujt e radios ishin dhe kanë mbetur gjurmë të asaj kohe. Patjetër që edhe ne kishim problemet tona ekonomike edhe sociale por i kemi tejkaluar duke qenë se kishim thelbësore dashurinë për njëri -tjetrin. Kemi qenë të lumtur në formën tone. 

CMG: A jeni i lumtur dhe i kënaqur me gjërat që keni arritur? Cilat janë mësimet që ju ka dhënë jeta ?

Artur Spanjolli:  Kjo është një çështje shumë e rëndësishme, e cila i dedikohet vetes në raport me çdo gjë që bën. Unë jam absolutisht shumë i lumtur  dhe gjithë jetën kam kërkuar dhe nuk jam ndalur kurrë. Kam qenë përherë puntor i madh dhe kërkues ndaj vetes sime. Artist të bën vetëm puna jote personale.
Një nga mësimet më të mëdha në jetë është që "Jeta kur të rrëzon ti mund të ringrihesh shumë më fort ". Lufta dhe përpjekja është më e bukur se arritja sepse gjatë rrugës çdo njeri mëson.

CMG: Si i kujtoni mbështetësit më te mire? A keni pasur mbështetjen e duhur ?
Artur Spanjolli: Patjeter që po. Kam qenë dhe vijoj të jem i rrethuar nga njerëz që më kanë mbështetur gjatë gjithë jetës sime. Familja ime ka qenë e bukur dhe e thjeshtë, por plot për të kuptuar rëndësinë e ëndrrave të mia. Ata kanë qenë aty në çdo hap timin për të më shoqëruar në rrugëtimin tim .

CMG: Vitet e para kur keni nisur të shkruani, si kanë qenë ato emocione?

Artur Spanjolli: Unë kam nisur të kuptoj vlerën e shkrimit në momentin që kam rënë në dashuri , aty nisa të shkruaj poezitë e  para. Ndjenjat ngacmuan penën time dhe kështu unë i futa në një rrugëtim të pafund .

CMG: Kush është sipas jush problemi i shkrimtarëve sot ?

Artur Spanjolli: Ndryshe nga çdo këndvështrim tjetër unë do të thoja që shkruhet shumë dhe ndoshta nuk ka mundësi për t'u lexuar aq shumë sa shkruhet. Vetëm koha i mban ose zhduk mediokritetet. Letërsia e mirë vjen një moment që pas shumë kohësh e gjen rrugën e vet për të ndritur.

CMG: Me çfarë i lidhni arritjet tuaja?

Artur Spanjolli: Arritjet e mia unë i lidh pashmangshmërisht me arritjet në letërsi.
Unë tani kam filluar të shkruaj më tepër në shqip sepse dua të jem i njohur edhe për lexuesin shqiptar. Në këtë fazë jam shumë i lumtur dhe i përmbushur sidomos pas panairit që i zhvillua në Tiranë për të cilin unë ruaj kujtime të bukura. Aty takova miq dhe lexues të mirë .

CMG:Cilat janë librat që do të na rekomandonit për lexuesit?

Artur Spanjolli: Do të rekomandoj disa njëkohësisht sepse kjo është një praktikë e ngjashme edhe me formën se si unë lexoj. Kur nis të lexoj unë lexoj disa libra njëkohësisht. Libri që mund të rekomandoj dhe që është shumë i bukur është "100 vjet vetmi", i thjeshtë për t'u lexuar dhe për t'u kuptuar. Gjithashtu libra shumë të mirë për të lexuar do të rekomandoja librat e Kadaresë. Pavarësisht se kam njohur letërsinë e botës i kthehem sërish kollosit tonë të letërsisë. “Zonja Bovari” gjithashtu është një libër që lexohet me shumë kënaqësi.

CMG: Ju keni ardhur me një botim në shqip, a mund të na tregoni më tepër rreth ketij libri?

Artur Spanjolli: “Gjelat këndonin ndryshe" është libri dhe është pritur shumë mire. Në fakt unë nuk kisha këto pritshmëri sepse libri është botuar në kohë rekord dhe mori një mbështetje të gjerë. Libri trajton mentalitetin tone, i cili duhet të ndryshojë sepse Shqipëria po bëhet pjesë e vendeve europiane dhe duhet t'i largohemi mentalitetit i cili na le pas. Ka shumë të vërteta në atë libër sepse është vetë jeta ime e përshkruar ndër vite .

Jeta ime është një pasuri e madhe sepse kam përjetuar shumë sisteme dhe kam shumë për të folur. Do doja që lexuesit  ta blinin librin tim të parë të shkruar shqip. Gjithçka është parë me ftohtësi me sytë e shkrimtarit, i cili jeton në botën perëndimore.

CMG: Cila është këshilla juaj për një 10 vjeçar?

Artur Spanjolli: Lexo dhe vetëm lexo!  Vetëm kështu në të ardhmen do të ndjesh se si të përket bota.

Intervistoi: Megi Latifi