PKK-ja hapi kongresin e 20-të kombëtar në Pallatin e Madh të Popullit të Pekinit / foto nga Xinhua
Ekspertët e Kinës thonë se presin me padurim perspektiva të reja për inovacion dhe zhvillim, pas prezantimit të raportit nga Xi Jinping në Kongresin e 20-të Kombëtar të Partisë Komuniste.
Raporti vë në dukje përparimet e shumta të Kinës në fushat kryesore të shkencës, nga fluturimet hapësinore me njerëz, te eksplorimi i oqeanit, teknologjia kuantike e informacionit dhe biomjekësia.
Raporti ka vendosur objektivat dhe drejtimet që do të udhëheqin planifikimin dhe zhvillimin e shkencës të Kinës.
Komuniteti shkencor i Kinës është frymëzuar nga raporti i prezantuar nga Xi Jinping në Kongresin e 20-të Kombëtar të Partisë Komuniste të Kinës dhe tha se do të vazhdojë të zgjerojë kufijtë, të bëjë përparime origjinale në teknologjitë bazë dhe të kontribuojë më shumë në nevojat strategjike të vendit dhe rritjen socio-ekonomike.
Raporti, i dorëzuar nga Xi të dielën, nënvizon se arsimi, shkenca dhe teknologjia dhe burimet njerëzore janë shtyllat themelore dhe strategjike për ndërtimin e një vendi modern socialist në të gjitha aspektet.
“Ne duhet ta konsiderojmë shkencën dhe teknologjinë si forcën tonë kryesore prodhuese, talentin si burimin tonë parësor dhe inovacionin si shtytësin tonë kryesor të rritjes”, - tha ai.
Kina është shfaqur gjatë dekadës së fundit si një komb inovativ, duke u ngjitur nga vendi i 34-t në 2012-n në të 11-tin në vitin 2022 në Indeksin Global të Inovacionit të publikuar nga Organizata Botërore e Pronësisë Intelektuale.
Kina lëshoi sondën e hulumtimit në Mars më 23 korrik 2020 në Qendrën e Lëshimit të Fluturimeve Hapësinore Wenchang të provincës Hainan të Kinës Jugore/ foto nga VCG
Raporti theksoi gjithashtu përparimet e shumta të Kinës në fushat kryesore, duke përfshirë fluturimet hapësinore me njerëz, eksplorimin hënor dhe marsian, sondat në det të thellë dhe në tokë, superkompjuterët, navigimin satelitor, teknologjinë kuantike të informacionit, teknologjinë e energjisë bërthamore, prodhimin e avionëve dhe biomjekësinë.
Long Haibo, studiues i Qendrës Kërkimore të Zhvillimit të Këshillit Shtetëror, tha se pa përparim në shkencë dhe teknologji, inovacioni nuk mund të ndodhë dhe se burimet njerëzore janë shtylla që mbështet përparimin në shkencë dhe teknologji dhe zhvillimin me cilësi të lartë.
“Këto janë ide të ndërlidhura dhe përforcuese reciproke, që janë vendimtare për zhvillimin e Kinës në epokën e re”,- tha ai për “Science and Technology Daily”.
Shoqata e Kinës për Shkencën dhe Teknologjinë tha se raporti ka vendosur objektivat dhe drejtimet që do të udhëheqin planifikimin dhe zhvillimin e shkencës të Kinës.
"Raporti është një dokument udhëzues, që ka propozuar ide të reja, strategji të reja dhe masa të reja për të transformuar kombin në një vend socialist modern në të gjitha aspektet dhe për të ecur drejt përmbushjes së qëllimit të dytë të njëqindvjetorit, që Kina të bëhet një vend i madh modern socialist në të gjitha aspektet deri në vitin 2049”,- tha ai.
Vaksinat kundër COVID-19 të kompanisë kineze "SinoPharm", të demonstruara në Ekspozitën e Tregtisë në Shërbime të Pekinit, në shtator 2022/ foto nga VCG
Një nga pikat kryesore të raportit, që krijoi një interes të madh në mesin e punonjësve kinezë të shkencës, ishte ideja e hapjes së zonave të reja për zhvillim.
Jin Li, president i Universitetit Fudan dhe anëtar i Akademisë Kineze të Shkencave, tha se duke qenë edukator dhe shkencëtar, ai pati një ndjenjë përgjegjësie të madhe kur ndiqte qëllimin e dytë të njëqindvjetorit.
Universiteti do të trajnojë më shumë profesionistë cilësorë, do të bëjë përparime më origjinale dhe do të përdorë risitë për t'i shërbyer vendit, shtoi ai.
Huang Wei, akademik dhe ekspert i njohur i elektronikës organike, tha se ekipi i tij së fundmi bëri një përparim në ndërtimin e fotovoltaikëve të integruar, i cili në thelb e kthen pjesën e jashtme të një ndërtese në një fermë diellore që mund të prodhojë energji elektrike.
Ky është një shembull i një përparimi teknologjik, që hap mundësi të reja ekonomike dhe përmbush nevojat e vendit në drejtim të zhvillimit të gjelbër, tha ai.
