Kompania kineze “Nreal”, e syveve të realitetit të shtuar (AR) synon të hyjë fuqishëm në tregun vendës, ashtu si në atë botëror, përmes bashkëpunimit me kompani të njohura, për të rritur përhapjen në masë te konsumatori. “AR” pritet të jetë platforma kompjuterike e gjeneratës së ardhshme dhe kompania me bazë në Pekin synon të shfrytëzojë plotësisht mundësinë për t'u sjellë konsumatorëve një përvojë të re dhe unike të realitetit të shtuar.
Pionieri kinez i syzeve të realitetit të shtuar, “Nreal”, do të zgjerojë vizionin e tij në tregun vendës, pas krijimit të një pranie jashtë vendit në pesë vitet e fundit, duke bashkëpunuar me operatorë kryesorë të huaj teknologjikë për t'i bërë syzet AR më të njohura.
Kompania me bazë në Pekin mbështetet nga investitorë të mëdhenj, duke përfshirë “Alibaba Group Holding Ltd”, “Sequoia Capital” dhe “Hillhouse Capital”.
Xu Chi, themeluesi dhe CEO-ja i “Nreal”, tha se “Nreal X” dhe “Nreal Air”, dy modelet më të fundit të syzeve AR, janë pjesë e planeve afatgjatë për të shfrytëzuar botën e metaverses, ose një version 3D të internetit.
Edhe pse AR është dëshmuar popullor për konsumatorët në telefonat inteligjentë, me aplikacione të suksesshme si “Pokemon GO” dhe “Snapchat”, pajisjet e konsumatorit nuk kanë arritur ende përhapjen në masë. Por, ka shenja inkurajuese, që tregojnë se tregu i pajisjeve AR të konsumit u trefishua në vitet 2020-2021, sipas kompanisë së kërkimit të tregut “Strategy Analytics” në raportin e saj të fundit.
Në mënyrë të veçantë, dërgesat globale të AR të konsumatorit u rritën 161 për qind në bazë vjetore nga viti 2020 në 2021. Në të njëjtën periudhë, rritja e të ardhurave nga pajisjet AR të konsumatorit arriti mbi 300 për qind nga viti në vit.
David MacQueen, drejtor ekzekutiv i “Strategy Analytics”, tha se “Nreal” po drejton tregun e konsumatorit AR dhe pozicionohet mirë në renditje, si për çmimin (599 dollarë) ashtu edhe për funksionalitetin. Shifrat e tregut të dërgesave të pajisjeve AR u rritën në 81 për qind në gjysmën e parë të vitit 2022, nga 75 për qind që rezultonte vitin e kaluar.
Teknologjia AR përçon imazhe digjitale në botën reale. Përdoruesit mund të mbajnë syzet e “Nreal” për të hyrë në aplikacione AR, si lojëra ose filma.
Foto nga uebsiti i Nrealit
AR formon një komponent kyç të metaverses, një koncept tendence që i referohet lirshëm një bote me komunitete virtuale të pafundme, të ndërlidhura, ku njerëzit mund të takohen, punojnë dhe luajnë, duke përdorur teknologji të tilla si syzet e realitetit virtual dhe syzet e realitetit të shtuar.
Sipas Xu, shumica e njerëzve nuk dyshojnë më nëse AR do të jetë platforma kompjuterike e gjeneratës së ardhshme dhe kompania me bazë në Pekin synon të shfrytëzojë plotësisht mundësinë për t'u sjellë konsumatorëve një përvojë të re dhe unike të realitetit të shtuar.
Ai pret që deri në vitin 2030 mund të ketë më shumë se 1 miliard syze AR ose të realitetit virtual, që ofrojnë përvoja të ndryshme ndërvepruese virtuale dhe reale.
“Njerëzit sot mund të mendojnë se kjo shifër është shumë e lartë, por ndonjëherë ne e mbivlerësojmë ndërveprimin e teknologjisë në dy ose tre vjet dhe nënvlerësojmë ndryshimet e sjella nga teknologjia ose produktet në më shumë se 10 vjet”,- tha Xu.
Sipas tij, avantazhet teknologjike të kompanisë qëndrojnë në fushat e algoritmeve të perceptimit 3D dhe teknologjisë optike. Ajo ka ngritur një bazë prodhuese optike në Wuxi, provincën kineze Jiangsu, për të zhvilluar module ekrani. Më shumë se 60 për qind e anëtarëve të stafit të saj janë të përfshirë në fushën e kërkimit dhe zhvillimit, ndërsa gati një e katërta kanë përvojë pune jashtë shtetit.
Deri më 31 dhjetor 2021, “Nreal”-i pati marrë 383 patenta. Nga viti 2019 deri në vitin 2021, shpenzimet e kompanisë për kërkimin dhe zhvillimin arritën në 230 milionë juanë (33 milionë dollarë).
Strategjia e “Nreal” për të hyrë në treg, në partneritet me operatorët globalë të telekomit, ka qenë një tjetër faktor kyç në rritjen e popullaritetit të produkteve të saj. Kompania ka bashkëpunuar me më shumë se 10 operatorë telekomi në botë për të popullarizuar syzet e saj AR, tha Xu. Produktet e kompanisë tani janë në dispozicion në vende të tilla si Koreja e Jugut, Gjermania, Spanja, Mbretëria e Bashkuar dhe Japonia.
Foto:VCG
“Këtë vit do të fokusohemi në zgjerimin e pranisë sonë në tregun kinez, për të ofruar një përvojë të re dhe unike të realitetit të shtuar për konsumatorët vendas”,- tha Xu.
Në gusht, “Nreal” njoftoi se ka bashkëpunuar me platformën e transmetimit video “iQiyi”, “Migu”, njësinë digjitale të “China Mobile”, prodhuesin e makinave elektrike “Nio” dhe platformën e videove të shkurtra “Kuaishou”, për të zhvilluar përmbajtje të shumëfishta AR të personalizuara.
“Nio”, për shembull, bashkëpunoi me “Nreal” për të zhvilluar syze të personalizuara që mund të projektojnë një ekran efektiv nga 201 inç në 6 metra, pasi prodhuesi i makinave synon t'u sigurojë pasagjerëve një përvojë vizuale gjithëpërfshirëse në modelin e tij të fundit SUV ES7.
Liu Xin, menaxheri i përgjithshëm i “Migu”, tha se teknologjia AR do të sjellë përvoja më interesante të shikimit të sporteve për konsumatorët dhe “Migu” do të bashkëpunojë me “Nreal” për të sjellë një përvojë gjithëpërfshirëse shikimi për Kampionatin Botëror të Futbollit të këtij viti që zhvillohet në Katar.
