Foto nga VCG

Kina premtoi të shtunën 300 milionë juanë (rreth 43.5 milionë dollarë) të tjerë, pas ndihmave emergjente me vlerë 100 milionë juanë (rreth 14.5 dollarë) të dhëna javën e kaluar për Pakistanin e goditur nga përmbytjet që kanë marrë më shumë se 1200 jetë njerëzish.

Luo Zhaohui, kryetar i Agjencisë së Bashkëpunimit Ndërkombëtar për Zhvillimin të Kinës, njoftoi vendimin e dhurimit gjatë takimit virtual që pati të shtunën me Akhtar Nawaz, kryetar i Autoritetit Kombëtar të Menaxhimit të Fatkeqësive të Pakistanit (NDMA).

Kina ka dërguar rreth 3 000 tenda me avionë ushtarakë, ndërsa 200 tonë qepë do të mbërrijnë në Pakistan nëpërmjet autostradës "Karakoram" brenda një jave, bëri të ditur Luo.

Ai tha gjithashtu se Administrata Meteorologjike e Kinës ka ofruar parashikimin e motit në kohë reale dhe shumë qytetarë, ndërmarrje dhe organe të pushtetit vendor në Kinë po organizojnë dhurime për Pakistanin.

Kina është e gatshme ta ndihmojë Pakistanin në rimëkëmbjen dhe rindërtimin pas fatkeqësisë, shtoi Luo.

Kryeministri pakistanez Shehbaz Sharif shprehu mirënjohjen të shtunën për ndihmën kineze. "Ajo është pasqyrim i lidhjes sonë miqësore të veçantë. Kjo mbështetje do të ndihmojë në dhënien e ndihmës aq të nevojshme për njerëzit," shkroi Sharif në "Twitter".

Sipas NDMA të Pakistanit, përmbytjet kanë shkaktuar 1 290 të vdekur dhe kanë prekur mbi 33 milionë njerëz, duke dëmtuar më shumë se 1.46 milionë banesa, 243 ura dhe 5 563 kilometra autostrada.

NDMA vuri në dukje se një e treta e Pakistanit është tani nën ujë dhe ujërat ende nuk kanë filluar të tërhiqen. (Artan/Fani)