NATO-ja vazhdon të mbetet "gurthemeli" i mbrojtjes kolektive për SHBA-në dhe Europën, tha të hënën presidenti amerikan Barak Obama.
Obama i bëri komentet pas takimit me sekretarin e përgjithshëm të NATO-s Jens Stoltenberg në Shtëpinë e Bardhë. Ata diskutuan mbi luftën kundër Shtetit Islamik (ISIS) në vazhdën e sulmeve të fundit terroriste në Bruksel.
Obama dhe Stoltenberg theksuan rëndësinë e fokusimit kundër ISIS dhe luftës kundër terrorizmit që ka depërtuar në Europë e në mbarë botën.
"Kjo është padyshim një periudhë e trazuar për botën," tha Obama. "Europa është një pikë qendore e këtij stresi dhe tensioni në sistemin e sigurisë globale."
"Ne qëndrojmë së bashku në luftën kundër terrorizmit," tha Stoltenberg, duke nënvizuar se të gjithë aleatët e NATO-s kontribuojnë në përpjekjet e SHBA-së dhe forcave të tjera për të shkatërruar ISIS-in.
Obama dhe Stoltenberg diskutuan gjithashtu edhe mbi Libinë, Afganistanin dhe Ukrainën. (Albana)