Afro 500 vetë protestuan në qytezën Dikili, në perëndim të Turqisë kundër planit të qeverisë për ndërtimin e një kampi emigrantësh.
Sipas marrëveshjes së re midis Turqisë dhe BE-së, emigrantët dhe refugjatët, që kanë mbërritur ilegalisht në Greqi nga Turqia do të kthehen, qysh nga e hëna.
Mustafa Tosun, kryetar i bashkisë së Dikilit, ku do të regjistrohen emigrantët dhe refugjatët që do të kthehen, tha se veprime të tilla do të dëmtojnë turizmin dhe sigurinë. Ndërsa shumë banorë u shprehën se infrastruktura e prapambetur e qytezës nuk përballon strehimin e dhjetra mijëra refugjatëve.
Turqia, aktualisht streha e 2.7 milionë refugjatëve sirianë, pranoi kërkesën e BE-së për kthimin e emigrantëve dhe refugjatëve, në këmbim të ndihmave financiare, udhëtimit pa viza të shtetasve të saj në BE, si dhe shpejtimin e bisedimeve për anëtarësimin në BE. (Wang Lei/ Eda Merepeza)