Kryeministri i Pakistanit Nawaz Sharif ka vendosur të anulojë vizitën e kësaj jave në Uashington.
Sharif, i cili do të merrte pjesë në Samitin e këtij viti për Sigurinë Bërthamore, ka vendosur të qëndrojë në Pakistan, pas sulmit vdekjeprurës që ndodhi të dielën në Lahore.
Gjatë njoftimit, Sharif tha se vendosmëria e vendit për t'u përballuar me militantët po rritet gjithnjë e më shumë.
"Me vendosmërinë e forcave tona të armatosura, përpjekjen e policisë e të institucioneve të sigurisë si dhe me mbështetjen e popullit, numri i incidenteve terroriste ka rënë në 3 vitet e fundit. Nuk do të lejojmë që ky numër të rritet përsëri. Nuk do t'i lejojmë terroristët të luajnë me jetën e popullin të Pakistanit. Kjo është vendosmëria ime, e qeverisë sime dhe e 200 milionë pakistanezëve."
Autoritetet pakistaneze kanë lejuar forcat paramilitare të hyjnë në provincën Punjab për hetimin e të dyshuarve, në të njejtën mënyrë që ata e realizuan në qytetin e trazuar Karachi gjatë viteve të fundit.
Një shpërthim vetvrasës ndodhi të dielën në një park në Lahore, ku ishin mbledhur shumë familje të krishtera për të festuar Pashkët.
Sulmi i përgjakshëm, kryer nga një fraksion i talebanëve, vrau mbi 70 persona dhe plagosi mbi 300 të tjerë. (Albana)