Qeveria kineze ka miratuar emërimin e Xie Xiaoyan-it si i dërguar i posaçëm i Kinës për çështjen e Sirisë, bëri të ditur të martën zëdhënësi i Ministrisë së Jashtme Hong Lei.
Hong Lei u shpreh se tani zgjidhja e problemit të Sirisë është futur në një fazë kyçe. Me përpjekjet e përbashkëta nga komuniteti ndërkombëtar, marrëveshja e armëpushimit në përgjithësi është zbatuar, ndihma humanitare po vazhdon dhe qeveria e opozita siriane kanë rifilluar bisedimet e paqes në Gjenevë.
Kina mban qëndrimin që zgjidhja politike është rruga e vetme për problemin e Sirisë dhe se OKB-ja duhet të luajë rol drejtues për zgjidhjen e këtij problemi.
Hong shtoi se Kina e emëron të dërguarin me synim që të nxitë bisedimet e paqes dhe të japë ndihmesë më aktive, për të shtuar komunikimin dhe bashkërendimin mes palëve dhe për të luajtur rol konstruktiv për zgjidhjen përfundimtare të problemit të Sirisë.
Zëdhënësi i diplomacisë kineze u shpreh se Xie Xiaoyan-i është një diplomat me përvojë, dhe ka qenë ambasador i Kinës në Iran, Etiopi dhe Bashkimin Afrikan. Ai i njeh mirë çështjet e Lindjes së Mesme dhe është i përshtatshëm për këtë detyrë. (Jiang Lei/Artan Goga)