Bisedimet e paqes për Sirinë në Gjenevë kanë bërë përparim dhe duhet të vazhdojnë, tha të hënën zëvendësministri i Jashtëm rus Sergei Ryabkov.

Deklarata e të dërguarit të posaçëm të OKB-së Staffan De Mistura në lidhje me vazhdimin e bisedimeve më 11 prill tingëllon optimiste, u shpreh Ryabkov-i në një intervistë për gazetën ruse "Izvestiya".

Negociatat e ardhshme duhet të sigurojnë përfaqësim të barabartë të kurdëve, ndërsa opozita siriane duhet të mbajë një qëndrim më realist dhe të heqë dorë nga përpjekjet për të vendosur parakushte, tha ai.

Lidhur me vizitën e fundit të sekretarit të Shtetit së ShBA-së John Kerry në Moskë, Ryabkov-i vuri në dukje se shpeshtësia e vizitave të kreut të diplomacisë amerikane në Moskë është e pashembullt.

"Kjo vjen nga natyra e çështjeve që janë diskutuar dhe nga njohja prej Shteteve të Bashkuara, pavarësisht deklaratave të tyre, se një numër problemesh të mëdha e të rëndësishme ndërkombëtare nuk mund të zgjidhen pa Rusinë," tha ai. (Artan Goga)