Kryeministri kinez Li Keqiang ritheksoi se Kina është kundër "çdo lloj lufte të monedhës", e cila do të ishte e dëmshme për rimëkëmbjen e ekonomisë botërore. Ai e bëri deklaratën gjatë takimit me presidenten e Fondit Monetar Ndërkombëtar (FMN), Christine Lagarde, ku shtoi se Kina nuk do të përdorë zhvlerësimin e juanit për rritjen e eksporteve, pasi kjo do të ndikonte në përpjekjet e saj për përmirësimin e strukturës ekonomike.
Shefja e FMN-së Lagarde vlerësoi komunikimin e fundit të Kinës me komunitetin ndërkombëtar për çeshtje si kursi i këmbimit të juanit, duke e cilësuar atë si efektiv dhe nxitës për rritjen e besimit të tregut.
Lagarde ishte e pranishme në Forumin e Zhvillimit të Kinës, që u zhvillua në Pekin. (Eda Merepeza)