Kina paralajmëroi Shtetet e Bashkuara që të mos mbështesin statusin e vëzhguesit për Tajvanin në Organizatën Ndërkombëtare të Policisë, Interpol.

Zëdhënësja e Ministrisë së Jashtme Hua Chunying, theksoi se Interpoli është një organizatë ndërqeveritare e përbërë nga vetëm shtete sovrane.

Javën e kaluar, presidenti amerikan Barack Obama nënshkroi dekretin që e lejon Tajvanin të marrë statusin e vëzhguesit në Interpol.

Zëdhënësja shtoi se Pekini i ka trajtuar vazhdimisht çështjet që lidhen me pjesëmarrjen e Tajvanit në organizatat ndërkombëtare, në përputhje me parimin e një Kine.

Ajo tha se autoritetet e pjesës kontinentale dhe palët e tjera përkatëse kanë arritur një "marrëveshje praktike" për angazhimin e Tajvanit në Interpol për të luftuar krimin, marrëveshje e cila deri tani ka rezultuar efikase. (Leftion Peristeri)