Ish-kryediplomati amerikan Henry Kissinger ka paralajmëruar se Kina dhe ShBA-ja duhet të bashkëpunojnë për të shmangur rënien në "kurthin e Tukididit", ose konfliktin mes një fuqie në rritje dhe një fuqie tjetër që ka si synim të mbrojë pozicionin e vet në botë.
Gjatë një dialogu me ish-këshilltarin e shtetit të Kinës Dai Bingguo në Forumin e Zhvillimit të Kinës në Pekin, ish-sekretari amerikan i Shtetit vuri në dukje se asnjëra prej këtyre dy fuqive nuk synon ta zëvendësojë tjetrën, megjithëse kanë opinione të ndryshme për çështje si denuklearizimi i Gadishullit Korean dhe problemi i Detit të Kinës Jugore.
Ish-këshilltari i shtetit i Kinës Dai Bingguo theksoi nga ana e tij se të gjitha vendet janë të ndërvarur nga njëri-tjetri dhe interesat e tyre janë ndërlidhur në një fat të përbashkët. Ai shtoi se është e nevojshme që të gjitha vendet, veçanërisht Kina dhe SHBA-ja, të përballojnë së bashku kërcënimet dhe sfidat e reja.
Forumi i Zhvillimit i Kinës për vitin 2016 zhvillohet me mbështetjen e Këshillit të Shtetit të Kinës.
Tema e forumit të sivjetshëm është "Kina në Planin e ri 5-vjeçar" dhe fokusohet në reformën në fushën e ofertës. (Xu Guang)