Autoritetet kineze kanë kundërshtuar sanksionet e reja amerikane ndaj Koresë së Veriut.

Zëdhënësi i Ministrisë së Jashtme kineze Lu Kang tha të premten se gjendja në Gadishullin Korean është sensitive dhe e ndërlikuar dhe Kina kundërshton çdo veprim të njëanshëm që mund ta përshkallëzojë tensionet atje.

Lu shprehu gjithashtu shqetësim mbi manovrën e përbashkët ushtarake Kore e Jugut-ShBA, që po zhvillohet tani dhe që është kundërshtuar nga Koreja e Veriut.

"Ne u kërkojmë të gjitha palëve të ruajnë qetësinë dhe vetëkontrollin, duke shmangur fjalët dhe veprimet që përshkallëzojnë tensionet në rajon. Përkeqësimi i situatës do të ishte i dëmshëm për të gjithë," theksoi zëdhënësi i diplomacisë kineze.

Presidenti i ShBA-së Barak Obama nxori të mërkurën një urdhër ekzekutiv, që autorizon sanksione të reja ndaj Koresë së Veriut.