Zyra Rajonale për Europën e Organizatës Botërore të Shëndetësisë (OBSh) ka paralajmëruar se njerëzit nga grupet më të rrezikuara në Europë, duke përfshirë emigrantët dhe refugjatët, janë më të kërcënuarit nga tuberkulozi.
Zëdhënësi i OKB-së Stephane Dujarriç u shpreh të enjten në një konferencë shtypi se OBSh-ja ka vënë në dukje se, për shkak të kushteve të jetesës të grupeve më të rrezikuara, tuberkulozi shpesh diagnostikohet vonë, prandaj është më e vështirë që këta njerëz të marrin mjekim të plotë.
"Deri tani nuk është përcaktuar se ekziston një lidhje sistematike ndërmjet migrimit dhe transmetimit të tuberkulozit. OBSh-ja thekson se tuberkulozi nuk duhet të përdoret si një arsye për të mos pranuar një refugjat apo emigrant," tha Dujarriç.