Sekretari i Përgjithshëm i OKB-së Ban Ki-moon u bëri thirrje të martën palëve në Siri, aktorëve rajonalë e ndërkombëtarë, si edhe Këshillit të Sigurimit, të ndihmojnë për arritjen e suksesit në bisedimet për Sirinë.

"Po ta humbim këtë rast, pasojat për popullit sirian dhe botën do të jenë shumë të frikshme për t'u menduar," u shpreh Ban në një deklaratë.

Të martën u mbushën pesë vjet nga fillimi i luftës civile në Siri. Statistikat e OKB-së tregojnë se gjatë kësaj periudhe mbi 250 000 sirianë janë vrarë, kurse më shumë se 4 milionë të tjerë kanë lënë shtëpitë e tyre.

"Autoritetet siriane mund t'u ishin përgjigjur në mënyrë paqësore kërkesave të ligjshme të popullit me dialog të vërtetë dhe reforma. Aktorët ndërkombëtarë e rajonale mund të ishin bashkuar për të ndihmuar në stabilizimin e Sirisë, në vend që ta përdornin atë si një fushë beteje për rivalitetet rajonale dhe konkurrencën gjeostrategjike", theksoi kreu i OKB-së në deklaratë.