Izraeli u bëri thirrje të shtunën gjashtë fuqive botërore për të marrë "masa ndëshkuese" ndaj Iranit, pas testimit të një rakete balistike më herët këtë javë.

Kryeministri izraelit Benjamin Netanyahu tha se fillimi i provave ishte një shkelje e marrëveshjes bërthamore. Ai shtoi se ka udhëzuar Ministrinë e Punëve të Jashtme për të kontaktuar me vendet që nënshkruan marrëveshjen dhe kërkoi marrjen e masave të menjëhershme ndëshkuese ndaj Iranit për "shkelje të përsëritura dhe të rënda mbi çështjen e raketave."

Edhe pse nuk i përmendi shkeljet, Izraeli tha se masat ndëshkuese janë "një hap i rëndësishëm dhe një provë e fuqive të mëdha në zbatimin e marrëveshjes bërthamore."

Të mërkurën, Irani lëshoi dy raketa balistike mbi të cilat shkruhej në hebraisht: "Izraeli duhet të zhduket."

Roja Islamike Revolucionare e Iranit tha se prova e raketave kishte për qëllim të "tregonte fuqinë parandaluese dhe aftësinë për t'u përballur me ndonjë kërcënim," dhe nuk e ka shkelur marrëveshjen bërthamore. (Leftion Peristeri)