Qeveria kineze ka reaguar ndaj një sondazhi të fshehtë, të kryer nga qeveria amerikane për të testuar shqetësimet lidhur me një blerje kineze në Australi. Raportohet se Departamenti amerikan i shtetit ka anketuar njerëz, duke mbledhur opinionet e tyre për marrjen me qira vitin e kaluar në vlerën 370 milion dollarë amerikanë nga firma kineze Landbridge, të një porti në veri të qytetit australian Darwin.
Zëdhënësi i Ministrisë së Jashtme të Kinës, Hong Lei në një deklaratë për shtyp e cilësoi si të pajustifikuar sondazhin, lidhur me shqetësimet e qytetarëve australianë.
"Investimi i firmës kineze është një veprim normal biznesi bazuar në parimet e tregut, ligjet ndërkombëltare dhe ato australiane. Marrja me qira ka sjellë përfitime të mëdha ekonomike për të dy vendet dhe është mirëpritur nga qeveria dhe populli australian" u shpreh zëdhënësi Hong Lei. (Eda Merepeza)