Vendet e tjera, dhe jo Kina, duhen akuzuar për militarizimin e Detit të Kinës Jugore, deklaroi të martën ministri i Jashtëm kinez Wang Yi.
Ndërtimi i objekteve mbrojtëse në ishujt dhe shkëmbinjtë nënujorë të saj në të vërtetë do të thotë se Kina po ushtron vetëm të drejtën e vet për vetëmbrojtje, theksoi Wang gjatë një konference për shtyp, në kuadër të sesionit vjetor të Asamblesë Kombëtare Popullore.
Kina nuk është as vendi i parë që ka vendosur armë, as vendi që ka vendosur më shumë armë dhe as vendi që ka kryer më shpesh aktivitete ushtarake në ishujt Nansha, tha kreu i diplomacisë kineze.
"Njerëzit flasin shumë për militarizim. Unë mendoj se Kina nuk mund të akuzohet për militarizim. Një etiketim i tillë u përshtatet më shumë disa vendeve të tjera," theksoi ai.
Wang Yi përsëriti se ishujt Nansha kanë qenë pjesë e pandarë territoriale e Kinës dhe çdo kinez ka detyrim për t'i mbrojtur ato.
"Kina nuk ka dhe nuk do të ketë pretendime të reja territoriale," u shpreh ministri i Jashtëm kinez Wang Yi. (Raela)