Të 15 vendet anëtare të Këshillit të Sigurimit të OKB-së miratuan njëzëri një rezolutë për vendosjen e sanksioneve të reja ndaj Koresë së Veriut.
Përfaqësuesi i përhershëm i Kinës në OKB, Liu Jieyi tha se pala kineze shpreson që sanksionet të nxisin nisjen e negociatave.
"Sanksionet nuk janë një qëllim në vetvete dhe rezoluta e Këshillit të Sigurimit nuk mund të zgjidhë përfundimisht çeshtjen bërthamore në Gadishullin Korean. Rezoluta e sotme mund të shërbejë si një pikënisje e re dhe gurthemeli për qëndrimin politik ndaj çeshtjes bërthamore në Gadishullin Korean. Historia ka treguar se dialogu dhe bisedimet janë rruga e vetme e drejtë për zgjidhjen e çeshtjes bërthamore në Gadishull, me synim përmirësimin e situatës në terren dhe gjetjen e rrugëve për zgjidhjen e çeshtjes bërthamore."
Sanksionet e reja ndaj Koresë së Veriut përfshijnë ndalimin e të gjitha eksporteve nga ky vend, përfshirë atë të qymyrgurit, hekurit dhe mineraleve të tjera të rralla. Gjithashtu sanksionet parashikojnë ndalimin e furnizimit me karburant të aviacionit si dhe forcimin e kontrollit ndaj anijeve të mallrave që hyjnë dhe dalin nga Korea e Veriut. Një ndër sanksionet është dhe ndalimi i të gjitha aseteve të fondeve të lidhura me programet balistike dhe bërthamore. (Eda Merepeza)