Kryeministri grek Alexis Tsipras i bëri thirrje grekëve të refuzojnë "ultimatumin e kreditorëve" në referendumin e ardhshëm.
Kreu i radikalëve të majtë u përsëriti sërish mbështetësve të përkrahin me krenari alternativën 'Jo', pasi kështu grekët do të tregojnë me vendosmëri se çështjet më të rëndësishme nuk i lënë të gjejnë zgjidhje në duart e të tjerëve, por vetëvendosin ata.
Protestat e shumta në Greqi në favor të alternativës "Jo" mblodhën rreth 35 mijë protestues, ndërsa ato kundër kësaj alternative u regjistruan 25 mijë.
Votuesit grekë do të drejtohen këtë të dielë drejt fletëve të votimit me bankat e mbyllura dhe kontrollet e kapitalit, masa të prezantuara prej së hënës.
Qeveria ka pranuar se bankomatët do të boshatisen deri të martën.
Megjithatë, Tsipras siguroi se pa marrë parasysh rezultatin e referendumit të së dielës, Greqia do të jetë në gjendje të nënshkruajë një marrëveshje më të mirë dhe bankat do të rihapen normalisht një ditë më pas. (Albana)