Presidenti i Kinës Xi Jinping dhe udhëheqës të tjerë të Azisë dhe Afrikës morën pjesë të premten në ceremoninë përkujtimore të Konferencës së Bandung-ut të vitit 1955.

"Ecja historike" nga Hoteli Homann deri në Gedung Merdeka, e njohur si shtëpia e pavarësisë, ishte pjesë e ngjarjeve historike për të kujtuar 60-vjetorin e mbledhjes së dy kontinenteve në qytetin indonezian.

Duke ndjekur gjurmët e paraardhësve të tyre, udhëheqësit kishin si qëllim të tregonin vendosmërinë për të kujtuar dhe shtyrë përpara frymën e solidaritetit, miqësisë dhe bashkëpunimit të Bandung-ut.

Samiti i këtij viti i mbajtur nën temën: "Forcimi i Bashkëpunimit Jug-Jug dhe Nxitja e Paqes dhe e Prosperitetit Botëror," mblodhi së bashku udhëheqësit e afro 100 kombeve aziatike dhe afrikane si dhe organizatave ndërkombëtare. (Leftion Peristeri)