Shqipëria përkrah aderimin në NATO të Maqedonisë dhe i dëshiron vendit fqinj të bëhet sa më parë anëtar me të drejta të plota i kësaj Aleance. Këtë e deklaroi të enjten ministrja shqiptare e mbrojtjes Mimi Kodheli gjatë takimit në Shkup me homologun maqedonas Zoran Jolevski.
Të dy ministrat nënvizuan se Shqipëria dhe Maqedonia janë të vendosura në luftën kundër terrorizmit, si dhe kundër çdo kërcënimi ndaj paqes, sigurisë së qytetarëve dhe vlerave demokratike.
Ndërkohë, gjatë takimit me presidentin maqedonas George Ivanov, Kodheli theksoi se Shqipëria ka luajtur një rol konstruktiv në marrëdhëniet me Maqedoninë edhe në kohë tensionesh ndëretnike. (Eda Merepeza)